Daini na Ja Chyum Mungga hpe hti sum ru yu ai shaloi e, Sagu rem wa kaja a lam hpe na la lu ga ai. Karai Kasang gaw mungkan masha ni hpe tsawra aimajaw, shi a kasha shingtai hpe mungkan ga a matu jaw kau ya sai. Mungkan masha ni ngu tsun ai shaloi e, amyu ru sai, nawku hpung, reng aya, matsan lusu n ginhka ai. Karai Kasang gaw, yawng mayawng a Karai Kasang re ai lam daini hti ai chyum mungga daw langai hta mung dan dan leng leng tsun da nga ai. Bai daini na kabu gara shiga hta e, lagut gaw lagu na, masu magaw na, damya mya na matu nga sa ai.
Raitim ngai gaw nanhte a a sak hpe (the fullness of life) jahkum shazup ya na matu she ngai du sa ai rai nngai. Kasha langai sha lu ai gaida jan shi a kasha si mat ai majaw, yawn myiprwi hte hkrap nga ai hpe bai jahkrung sharawt ya nna, Madu Yesu gaw asak daju re ai Karai Kasang rai nga ai hpe sak se hkam madun dan ya sai. Ja chyum mungga hta e, “Ngai hpe kam sham ai wa gaw si mat tim mung asak bai hkrung na re. nga nna, htani htana, n htum n wai ai asak hpe mung, ga sadi jaw da ya sai rai nga ai. Shiga madat ni yawng hte e mungkan ga a asak, Wenyi asak, htani htana a asak madu Karai Kasang re ngu ai hpe kam sham let asak hkrung hkawm sa nga ga law.