Daini gaw, Masha a Man e Dinghpring Ra ai Lam hpe jawm myit sumru yu ga.
Shawng nnan, Ja chyum mungga kadun hpe shawng madat yu ga.
2 Korinhtu 8:21 hta: “Dai Madu a man e sha n rai, masha a man e mung htaphtuk ai ningli madun na, anhte myit yu nga ga ai” nga nna Kasa Pawlu tsun da ai.
Daini na anhte a mungkan gaw “identiy crisis” ngu ai tinang hkum hpe grai shadan shadawng mayu ai manghkang hte hpring nga ai. Social media, Internet ni grau madang dep mat sai majaw, kadai mung tinang a lam hpe shapraw dan, madun dan lu ai aten rai mat sai. Tinang hpe masha loi li e sha chye na, shing n rai, masha daw-wa daw -tsa e chye na hpe ra ai kun, lata la mai nga ai.
Dai hte maren, anhte a myit masin hta, man taw nga ai shara hpe online mungkan hpe tsaw ra ai hte jahpring na kun; shing n rai, tinang a atsam, gawng kya lam, shut kau ai lam, awng dang lam ni hpe kata lam chye ya nna tsaw ra hkrum na hpe lata na kun, ngu ai lam lahkawng nga nga ai.
Masha a man e dinghpring ai gaw, kaga masha ni mu mada, shadu ai lam ni kaw na kaja wa lawt lu na matu langai sha re ai lam rai nga ai. Kaga masha ni tinang hpe tsaw ra shagrau hkra, tinang a kraw hta n rawng ai hpe shakut galaw madun ai gaw, tsaw ra myit majing n rai nga ai zawn, kaja wa mung tsaw ra hkrum na mung n rai nga ai.
Hpa majaw nga yawng, dai zawn shakut taw ai ni a myit, kraw lawang hta, “Nye a lam hpe shanhte chye mat yang gaw, ngai hpe n tsaw ra mat na re” ngu ai hkrit myit rawng nga malu ai. Dai gaw, “Anhte kaja wa tsaw ra hkrum na lam a hpyen” rai nga ai.
Ra ai hta jan nna shapau ai, shut ai hku tak sawn ai hte dingsang masu tsun ai lam ni gaw, tinang hpe kaga masha ni tup hkrak chye na ai hte tsaw ra ai kaw na tsan gang shangun nga ai.
Tinang a shut mara ni a matu tawng ban ai, myit malai ai, manang ni tinang hpe jaw ai hku mu mada lu ai lam ni gaw, Chyoi Pra ai Wenyi anhte hta nga nga ai a apu asi ni rai nga ai hpe Chyum Mungga hta anhte mu lu ga ai. Kasa Laika 19:18 hta,
“Kamsham sai ni law law hta na mung sa nna tinang galaw shut ai lam ni tawngban tsun dan ma ai.” nga nna sakse hkam da nga ai.
Kolose 3:9 hta mung, “Shada da masu magaw ga hkum tsun myit; kaning rai n me law, dai gawng shingyan tingsa hte tinang a arawn alai hpe, nanhte raw kau myit dai” nga nna shadum da nga ai.
Anhte a lam hpe shapau ai, masu ai gaw, masha ni anhte a ntsa, mu mada ai hpe Karai Kasang anhte hpe mu mada ai hta grau manu shadan ai hpe madun ai rai nga ai. Anhte hkum hpe anhte masha ni a man e grau yu htuk hkra shakut ai lang shagu, Karai Kasang a chyeju a shinggan de anhte du mat wa magang rai nga ai.
Kaja wa tsaw ra hkrum na matu, Karai Kasang hte masha a man e dinghpring ai hku nga ai hte hpang ra ai. Brenman Manning tsun ai,
“Masha ni nang hpe shakawn shagrau ai gaw, nang hpe lamu de n pyen du shangun lu ai zawn, shanhte a mara shagun ahpyak ai lam mung nang hpe nhkun de n lu kanawng bang kau ai. Shanhte nang hpe jahka kau ai gaw nang hpe machyi shangun na re; rai tim, si hkra gaw n rai na re.”
Akyu hpyi sumru yu ga:
- Na a makau na manang ni hte dinghpring ai hku nga na matu ahkyak ai ngu ai hpe sumru yu u.
Ga shagawp Laika 28:6 hta na, “Malang ai hku hkan nang ai, matsan mayan wa gaw, Magaw ai hku hkan nang ai sahti wa hta, grau mai nga ai” nga ai hpe mung myit yu ga.
- Mungkan masha ni, nang hpe madi shadaw, tsaw ra shakawn shagrau hkra, nang shakut kau sai lam, Karai Kasang hpe tawngban u.
Nang ra ai chyeju ni yawng hpe jaw ya rit ngu nna hpyi u. Na a lam Shi gara hku hkam sha ai kun, ngu nna san yu u. Shi, na mara ni hpe rau kau ya ai hpe mung hkam la u.
Kasa Laika 3:19-20 hta, “Dai Madu kaw na ngwi pyaw ai aten ladaw du ru ga hte, Yesu ngu ai, nanhte a matu san da ya ai Hkristu hpe, shi shangun dat ya ru ga, nanhte a mara raw mat na matu, myit malai lu nna kayin wa marit” ngu nna saw shaga nga ai.
- Na hkum hpe nang, dinghpring ai hku mu mada chye hkra shakut na, ngu nna myit hkut da u. Ya nang hta byin nga ai hta jan nna, n shapau na matu, Karai Kasang kaw na chyeju n-gun atsam hpyi u.
1 Yawhan 4:18 hta, “Tsaw ra ai myit hta e hkrit kang ai myit n rawng lu ai; hkrit kang ai myit ari hkrum nga ai majaw, hkum chyip re ai tsawra myit gaw, hkrit kang ai myit hpe shaden kau wu ai: hkrit kang nga ai wa chyawm gaw, tsawra ai myit garai n hkum lu ai” nga nna shadum da ai.
Tinang hkum hpe shapau, shagrau la ai kaw na lawt lu na lam gaw, manaw manang hpung masha ni a man e, man man mara tawngban ai lam rai nga ai. Mara tawngban na matu hkrit ai myit n rawng ga.
Yawng hpe Kara Wa chyeju jaw let bau sin ya nga u ga!
By Cardinal Charles Bo
