Mali Nmai Wa Lawng Ginra rai nga ai Njang Yang jau ginwang de Wa Saradaw John Mung Ngawn La Sam sa du kawan ai majaw nawku hpung masha ni kaw nna Saradaw hpe kabu gara hkap tau hkalum la ai lamang hpe ( 15 May 2025 ) ya shani galaw la lu sai hte ginwang up jau htawt sit galai lit shatsam ai lamang hte nawku hpung masha ni marai ( 110 ) jan Ninggun Shaja Sakramentu hkam la ai lamang hpe ( 16 May 2025 ) ya shani galaw la lu sai.
Njang Yang jau ginwang hta ( 3 ) ning tup ginwang up jau magam gun hpai lai wa sai Wa Jau Joseph Zinghtung La Nu gaw Nawng Hkying jau ginwang de htawt sit magam gun na lit shatsam hkrum sai rai nna, ginwang up jau lit magam hpe RVA Jinghpaw Nsen Shapoi Dap lit hkam magam hpe gun hpai taw nga ai Wa Jau Patrick Naw Lang Zau Jat Awng matut gun hpai sa wa na matu lit shatsam ap ya sai rai nga ai.
Ginwang up jau htawt sit galai lit shatsam ai lamang hta matut lit la gun hpai sa wa na Wa Jau Patrick Zau Jat Awng kaw nna Wa Saradaw hte sa du lawm ai wa jau ni, nawku hpung shawa masha yawng a man hta nawku hpung a matsun, htung tara hte maren nawku hpung masha ni hpe woi awn sa wa na matu Chyum Laika hta lata mara ga sadi hkam ai, lit shatsam hkrum ai matsun laika pa hta ta masat lekmat htu ai lam ni hpe galaw ai. Ginwang up jau lit magam hpe gun hpai lai wa sai Wa Jau Joseph Zinghtung La Nu kaw nna mung jau ginwang ting hte seng ai jahpan chyarang hte nawku jawng Zaw ni hpe ap ya ai lam galaw lai wa sai rai nga ai.
Njang Yang jau ginwang gaw lai wa sai 2020 Ning September 17 ya shani tara shang hpaw da lu sai jau ginwang rai nna Mare kahtawng ( 14 ), hpung masha htinggaw ( 359 ), hpung masha ( 2000 ) jan nga ai jau ginwang rai nga ai.
