Anhte a prat hta, jet ai atsam ningja hte lawt lu ai lam de sa ai langai sha re ai lam gaw, anhte a ra kadawn ai hte grit nem ai lam rai nga ai. Dai majaw, daini na matu ga-baw hpe “Karai Kasang Hpe Anhte Ra ai” ngu nna masat ga.
Anhte, Karai Kasang a man hta grit nem ai, anhte a gawng kya ai hte, shi hpe ra kadawn ga ai, ngu nna n yin la dingsa, Shi a hpring tsup ai chyeju hpe anhte hkam la lu na n rai ga ai. Rai tim, anhte malawng maga gaw, tinang a n-gun kya ai dan dawng mat na hpe grai hkrit ai; tinang hta atsam nga ai ngu ai hpe mahtang shakut nna madun mayu ga ai.
Shakawn Kungdawn Laika 73:26 hta gaw,
“Nye a hkum shan hte myit masin mat wa timung, Karai Ksang gaw nye a myit lunghkrung hte, prat dingsa na Sali wunli rai nga ai” nga nna tsun da nga ai.
Anhte a myit masin salum shanu nga na kaja dik ai shara gaw, Karai Kasang hpe ra kadawn ai ngu nna aten shagu hkam la ai shara rai nga ai. Karai Wa gaw shi a “garum ai” hpe anhte hpe atik anang n jaw ai.
Shi a hkum tsup mai kaja ai “myit ra sharawng lam” hkan na matu mung shadut jahkat n re ai. Anhte hpe shi hpan tawn da ai lam a yaw shada lam rai nga ai “Shi hte rau kanawn mazum” ai lam hpe hkan na matu mung, adip arip n galaw ai.
Raitim, “anhte shi Kawa a garum ai hpe ra ga ai” ngu nna yin la ai hte rau, shi a tsawra ai gaw, anhte a kraw lawang de dumbre bang wa nna, hkraw hkun nga ai hte hkyi ba hkrum nga ai shara ni hpe myit dik kabu pyaw ai lam hpe jaw ya ai.
Dai hte seng nna, San Luka ka tawn ai Kabu Gara Shiga 10:38-42 hta na jawm sharin la ga:
“Kahtawng langai mi de Yesu shang wu ai: Marhta ngu ai numsha langai mi mung, shi a nta hta shi hpe hkap la wu ai. Dai numsha hta Maria ngu ai kanau langai mi nga ai: shi gaw Madu a lagaw nhpang e dung nga let, shi a ga madat nga ai.
Marhta chyawm gaw galaw jaw ai amu law law a majaw myit kyin dum nga ai: dai rai nna shi sit sa nhtawm, “Madu e, ngai nau gaw galaw jaw ai amu hta ngai hpe hkrai sha rap di da ai hpe, nang hpa n nawn ya nni? Ngai hpe garum na, shi hpe tsun dat ya e,” ngu wu ai.
Shaloi dai Madu gaw, “Marhta, Marhta, nang gaw amu lam law law a majaw myit ru nna tsang nga ndai: rai timung, ra grau ai lam gaw langai sha she rai nga ai: Maria gaw kaja ai kumhtaw lata la nu ai rai nna, dai hpe shi kaw na shaw la kau ya lu na n rai.”
Ndai chyum mungga daw hta, Madu Yesu tsun ai “Kaja ai kumhtaw” ngu ai ga-hkaw gaw anhte hpe grau madang tsaw ai shaga la ai lam de saw shaga nga ai. Anhte atsawm sha myit sawn yu yang, Maria zawn anhte n galaw ai hpe mu lu na re.
Anhte Karai Kasang a matu galaw lu ai, kaja dik ai lam gaw shi a lagaw nhpang e dung nna shi a nsen hpe madat ya ai rai nga ai. Shi Kawa, anhte kaw na marit dik ai lam gaw, Shi a lagaw nhpang e sa dung let, salum chyinghka ni hpe hpaw malang nna – shi a tsawra ai, sharin ya ai, shamai shatsai ya ai lam ni hpe hkam la nna shi hte rau nga na matu rai nga ai.
Maria gaw, Yesu hpe shi a Ningpawt ninghpang hku nna yu ai, shi a kana Marhta shi hpe kaning nga na ngu ai hpe shi n myit ai. Dai majaw, Maria lata la ai hpe, Madu Karai hkumnan madi shadaw shagrin ya sai.
Anhte mung, ndai dinghta ga prat na lai mat wa lu ai mungkan lam ni hte sha, ram dum taw sahka! Anhte hpe Karai Kasang jaw da ai manu hta grau nun ai lam ni hpe sha, hkan shadik nga ga ai. Karai Wa ra sharawng ai lam ni hpe n hkan tam ai sha, masha ni a shagrau shakawn ai hpe sha hkan shachyut kau ai kade lang mi rai sahka!
Akyu hpyi sumru yu ga:
- Nang, Karai Kasang hpe ra ai ngu nna hkap la ai gaw kade ahkyak ai, ngu ai hpe sumru yu u.
San Yawhan 15:5 hta, “Ngai gaw tsabyi ru madung rai nga nngai, nanhte gaw lakung lakying ni rai nga myit dai: ngai hta noi nga nna, ngai mung dai wa hta noi nga ai rai yang gaw, dai wa gaw asi law law si wa lu ai, kaning rai nme law, ngai hte hka jang, nanhte hpa mung n galaw lu myit dai ”nga nna Yesu shadum da nga ai.
- Nang hkrai nang, ram dum, law dum sai ngu ai shara nga a ni? Gara lam ni hta mungkan lam ni hte jahpring shatsup na shakut yu sata?
Shakawn Kungdawn 73:26 hta gaw, “Nye a hkum shan hte myit masin mat wa timung, Karai Ksang gaw nye a myit lunghkrung hte, prat dingsa na Sali wunli rai nga ai” nga nna tsun da nga ai.
- Mungkan a arai ni, myit ru myit tsang ai lam ni, hkrit tsang ai lam ni yawng hpe makau de da kau nna, Madu Yesu a lagaw nhpang e sa dung na matu aten la ga. Shi nang hte ni htep nga ai hpe madun na matu Yesu kaw hpyi u. Nang hpe shi a chyeju hte ka-up ya na matu hpyi u. Shi a mai kaja ai lam hta shingbyi na matu aten la ga.
Hpilipi 4:19 hta gaw, “Nye a Karai Kasang chyawm gaw, shi sutgan su nga ai hte maren, Hkristu Yesu hta e hpung shingkang hte nanhte a ra mara hte hpe jahkum shatsup na marin dai” nga nna gasadi jaw da nga ai.
Mahte 11:25-30 hta na Madu Yesu a akyu hpyi ga hte shi tsun ai ga gaw nang hpe, masha a myit nyan hte n dep lu ai simsa lam jaw ya u ga:
“Sumsing lamu hte ginding aga a Madu, Wa e; hpaji byen-ya rawng ai ni hte myit kunghpan ai ni kaw na ndai lam nang makoi magap da nhtawm, ma kaji ni hpe madun dan ndai majaw, ngai nang hpe shakawn kungdawn nngai: rai sa, Wa e, nang tsaw ai hku, ndai rai nga lit dai.
Nye Wa gaw arai yawng mayawng ngai hpe ap ya ni ai; Wa hta kaga, dai kasha hpe kadai n chye lu ai: dai Kasha hte dai Kasha
jahtoi ya mayu ai masha hta kaga, Wa hpe mung, kadai n chye lu ai.
Hki ba la nna lit li gun ai ni yawng hte e, ngai kaw wa marit; ngai nanhte hpe ban sa shangun na made ai. Ngai gaw myit sumnung ai hte myit gyip nga nngai rai nna nye a kandang hpe hpai mu, nye a lam sharin la mu: dai rai yang nanhte a myit masin ban sa ai hkrum na malit dai: kaning rai nme law, nye a kandang hpai loi ai hte, nye a lit mung tsang nga li ai”.
Yawng hpe Wa Karai Kasang shaman ya nna myit masin a ban sa ai hpe jaw ya u ga.
Mungga – Cardinal Charles Bo
