Wa Sarabyin Leo XIV Missa hkungga hta: ‘Ngai lu ai hte Ngai Hta Nga Ai Atsam yawng hpe nang Wa Kaw nawng ya nngai.”

Wa Sarabyin Leo XIV gaw Roma na San yawhan Lateran Nawku Htingnu kaba hta shawng ningnan lang na Missa Hkungga nawng ya ai hte shi a  ginwang kata na dinghku nnan ngu na hpung masha ni hpe shakram ga tsun lai wa ai.

Kaga masha ni a ga nsen hpe madat ra ai zawn grau nna Karai Kasang a nsen hpe madat ra ai. 

Dai myit masa gaw, Wa Sarabyin Leo XIV a, lai wa sai Laban shani e Roma mare na San Yawhan Lateran Nawku Htingnu e Missa hkungga nawng jau ai ten, hkaw tsun ai mungga a madung lam rai nga ai. 

Roma mare na Nawku Htingnu de n sa shi yang, Wa Sarabyin gaw, mare a mung shawa hte democracy uphkang masa a shara rai nga ai Roma mare na Capitoline bum kaw jahkring mi sa ai shaloi, mare salang ngu na Roberto Gualtieri kaw nna shi hpe shakram hkalum lai wa ai. 

Wa Sarabyin gaw, mare salang wa hte dai shara kaw nga ai asuya magam gun ni hpe kabu gara ai hte hkap tau hkalum la ai majaw chyeju dum ga tsun let, Shi gaw, “Roma mare gaw, Kabu Gara Shiga hte n-gun lu nga ai, shinggyim nga pra masa hte htunghking masa manu dan ai lam ni a majaw Roma mare gaw galoi mung laklai nga na hpe myit mada ra sharawng ai lam tsun lai wa ai.

San Yawhan Lateran Nawku Htingnu hta shi a mungga hkaw tsun hpang ai hta Cardinal ni, saradaw ni, “tsawra ai Jau ni” hte  kam sham ai hpung masha ni hpe shakram ngut ai hpang, Roma gaw San Petru , San Pawlu hte n dang hti ai Hkristu a sakse share shagan ni a labau kaba hpe madu da lu nga ai hte ndai cathedral nawku htingnu a chyinghka ndaw na shakum e ka da ai ‘Mater ómnium Ecclesiarum’ ngu ai ga si ni zawn,” anhte mung laklai ai hku lit magam hpe gun hpai na matu  tsun lai wa ai.

Dai hpang Wa Sarabyin Leo XIV gaw, Wa Sarabyin Francis a ga hpe lakap nna, “Nawku hpung a kanu zawn re ai lam hte, shi a madung arawn alai ni rai nga ai: matsan dum myit, sak jaw ai lam, madat mara chye ai atsam ni hpe ayan tsun shapraw shalawm lai wa ai.” Ndai atsam marai ni gaw karum ya ai sha n-ga, “myit mada ai lam ni hte ra kadawn ai lam ni hpe n tsun shapraw shi yang pyi, tau hkrau chye da lu na matu karum ya ai” nga nna tsun lai wa ai.

“Ndai atsam marai ni gaw shara shagu hkan nga ai Karai Kasang a amyu masha ni a kata, ndai mare na anhte a nawku hpung kaba a dinghku kata, kam sham ai ni, hpung woi Jau ni a myit masin kata, grau nna ngai hkum nan a myit masin kata hta e matut nna rawt jat galu kaba wa na hpe myit mada nga nngai,” nga nna tsun lai wa ai.

Karai Kasang a nsen hpe madat ga

Shani shagu hti sumru ai lam ni kaw na n-gun lagaw la nna, moi na Hkristan hpung ni gaw, kabu gara shiga hkaw tsun ai lam hta n-gun ja ai, hpara shaje nawku nga lai wa sai ni hpe gara hku yak hkak ai hte hkrum sha lai wa sai hpe sawk sagawn nna, Wa Sarabyin gaw, “ndai lam yawng hta ahkyak dik htum madat mara ai lam gaw Karai Kasang a nsen hpe madat mara ai lam rai nna, ndai hku nna yawng mayawng byin tai wa lu ai” ngu nna ahkyak shatai tsun lai wa ai. “Dai hku nna, kahkyin gumdin lam gaw, grau nna ‘nanhte a lahput di let’, akyu hpyi ai hte tut nawng myit malai lu ai hku nna gawgap lu ai hpe myit dum shangun lai wa ai.

“Dai myit ru myit tsang lam hta sha, masha langai hte langai gaw, ‘Abba, Wa e’ ngu nna jahtau nga ai Wenyi a nsen hpe tinang a kata kaw hkam sha lu nna, dai lam a majaw kaga masha ni hpe hpunau ni zawn madat chye na ya lu na re.” nga nna tsun lai wa ai.

Wenyi lam madun ai 

“Kabu Gara Shiga gaw ndai shiga hpe grau nna ngang kang shangun ya ai: prat a dawdan lam ni hta anhte langai hkrai n re ai sha,”  ngu ai hpe Wa Sarabyin matut tsun lai wa ai. Chyoi Pra Ai Wenyi gaw anhte hpe madi shadaw ya ai, “sharin achyin” ya ai hte “shadum jahprang ya ai” hku nna hkan nang ai hte lam madun dan ai. Yesu tsun ai lam yawng hpe bai shadum ya ai. Wenyi gaw anhte hpe madi shadaw ya nna, “sharin achyin” ai hte “shadum jahprang ai” hku nna hkan sa na lam hpe madun dan nga ai. Yesu tsun ai lam yawng hpe bai shadum shangun ya ai.

Shawng nnan, Wa Sarabyin sang lang dan ai hta, Wenyi gaw Karai Kasang a mungga hpe anhte a myit masin kata de sung ai hku dawk bang ya ai. Ndai gaw Ga Shaka Dingsa hta tsun da ai zawn nlung lungpa hta ka da ai tara n rai sai, Anhte a myit masin hta ka da ai tara rai mahtang rai nga ai. Ndai kumhpa gaw anhte hpe gau ngwi ngwi hte rawt jat wa shangun ai, anhte Shada da “Hkristu a shiga ni” tai wa hkra karum ya ai.

“Shing rai, kabu gara shiga hpe grau hkrak hkra hkaw tsun lu magang, Wenyi a atsam gaw anhte a kata na myit masin hpe jasan jaseng na matu ahkang jaw lu magang,  bai nna anhte a ga hpe asan sha, myit masin mahkra hte tsun lu magang, Anhte a ra sharawng ai lam ni hpe dinghpring ai, San seng shangun ai, Anhte a akyang lailen ni hpe sharawng shara rai galai shai ya ai hpe hkap la yang, “grau kaja ai hku hkaw tsun lu na re.”nga nna tsun lai wa ai.

Ndai kaw kaga gasi langai mi mung lawm wa ai. Dai gaw “Sadi jaw ai” lam rai nga ai sadi jaw shadum ai lam ngu ai gaw: “Anhte hkrum lai wa sai lam hte sharin la lu sai lam yawng hpe myit masin hte bai maram dinglik yu nna, de a lachyum hpe sung sung bai hkam sha chye lu ai hte, de a tsawm htap ai lam hpe manu shadan hkam sha lu na matu re nga nna tsun lai wa ai.