Anhte a Wa Karai Kasang, anhte hpe jaw mayu ai chyeju mahkra hpe hkam la nna, Shi hte anhte a lapran na kanawn mazum ai lam mung, grau kaja wa u ga, shakram dat nngai.
Daini, anhte jawm sumru yu na Ga Baw gaw:
Karai Kasang a man e Dinghpring Ra Ga ai Lam rai nga ai.
Karai Kasang a mai kaja ai gaw, anhte hkrum yu ai lam ma hkra hta kaja dik rai nga ai.
Rai tim, anhte gaw, dai Karai Kasang a sung ai tsaw ra matsan dum myit ngu ai hka-nu a makau hkan sha naw kagat gahkrang hkawm nga ga ai. Shi a chyeju hpe sung ai hku hkam la lu na matu gaw, “anhte a salum ni” hpe jaw ai, dinghpring ai hku naw sharai chye ra ga ai.
Hpunau ni e, anhte gaw, tinang kaning re ai masha re ngu ai hpe kaga masha ni n chye hkra masu shakut nna tinang hkum, myit masin hpe grai pu ba shangun ga ai.
Nye a kraw lawang hta kaja wa byin nga, rawng nga ai hte nhtan shai nna, tinang a nta masha ni, rung hkan na manang ni, Karai Kasang pyi, ra sharawng na re, ngu ai nsam, lailen ni hpe shakut madun chye nga ai.
Anhte kadai re ngu ai hpe kaga masha ni chye kau jang, anhte hpe yu kaji, ningdang kau, n ra kau na hpe grai hkrit tsang chye ga ai. Shaloi, anhte hpa mung n tai mat na re, ngu nna sawn, myit la chye ga ai.
Gasan san yu ga, “nye a hkum hpe, n masu ai, sawt ai hku n re ai sha, nga sa ai rai yang, ram na i? Dai hpe, Hebre Hpung masha ni hpang de shagun ai Laika 4:13 hta ning nga tsun da nga ai:
Ndai chyum – daw gaw, anhte hpe hkrit kajawng shangun na re. Yawng mayawng hpe mu, chye lu ai Karai Kasang gaw, ngai galaw sai amu ma hkra hpe chye lu ai rai yang, ngai kaga masha ni hpe n chye shangun gwi ai – ngai hta kaja wa byin nga ai lam ni hpe– Chyoi Pra dik ai Karai Kasang a mi / man kaw na ngai gara hku makoi na, n hkrit ai sha kaning rai tsap gwi lu na rai ta?
Rai tim, sumsing Lamu na anhte a Kawa a, atsam kaba rawng ai, mau n ma re ai shi a tsaw ra myit hpe hkam la lu ai shaloi gaw, anhte shakut nna gaw shachyaw taw ai – atsam n rawng ai, shut taw ai, masu hkalem ai shakum ni gaw, lam mi a hpang lam mi, run hkrat mat wa lu nga ai.
Anhte a salum ni hta rawng ai n jaw, n teng ai lam ni hpe hpaw hpyan dan ai mahkrun gaw, Wa Karai gaw, shi a kup tsup ai matsan dum lama ai, myit galu ai hte anhte a hpang e ding-yang hkan nang nga ai lam hpe shadan shaleng ya ai.
Karai Kasang gaw, anhte shi hpang de salum chyinghka hpe dinghpring ai myit hte hpaw let, sit sa na matu myit galu ai, tsaw ra ai hte lata dingsi nna shaga nga ai.
Anhte nan – masu ai, sawt ai myit hte sa ai sha n rai yang gaw – Wa Karai anhte hpe shadang tup bai hkap tau la ai.
Madu Yesu tsun dan ai “Dam Mat ai Kasha” ga shadawn hta: kasha myit malai nna kawa hpang de bai nhtang wa ai shaloi, Kawa gaw kasha hpe hkap ahpum, lashum, bawp la nna, kawa hte kasha a hku hkau taw ra ai kanawn mazum lam hpe shawng na hte maren bai jaw ya ai. Hpa majaw nga yang, kasha a salum gaw, dinghpring ai, shagrit shanem ai madang hta du nga sai majaw rai nga ai.
Anhte gaw, Karai kasang a man e, kaja wa dinghpring ra ga ai; shi gaw, n jaw ai hpa hpe mung hkap la na n rai. Sawt ai hku nga sa ai ni hpe, shi galoi mung n garum ya na re.
“Sawt ai myit rawng ai masha gaw, myit daw ai hte sha hkrum na re; hpa majaw nga yang, shi, Karai Kasang a nsen hpe galoi mung nna na re” nga nna, Brennan Manning ngu ai laika sara wa tsun da ai.
Karai Kasang a man e dinghpring ai hku hkawm sa ai gaw, chyeju jaw ya lu ai Kawa hpe, tinang a sak-hkrung prat hta ra dik ai shara ni de saw shaga bang ai lam rai nga ai.
Anhte makoi magap shakut ai anhte a wunma ni hpe shamai ya na matu, anhte shi hpe saw shaga na hpe Madu Karai ra sharawng nga ai. Anhte a salum ni hta rawng ai – sinmak dik, ja dik ai shara ni hpe gram sharai, shamai ya nna, Chyoi Pra ai Wenyi a asi ni law law si wa lu hkra garum ya mayu nga ai.
Akyu Hpyi Sumru Yu Ga:
- Dinghpring ai gaw, Karai Kasang a man hta ahkyak ai ngu ai hpe sumru yu ga. Karai Kasang a man hta nang makam masham hta n-gun kya ai ngu ai hpe hkap yin la lu na n-gun atsam hpe Chyoi Pra ai Wenyi kaw hpyi ga.
Hebre 4:13 hpe bai hti yu ga: “Shi a man e n dan n leng ai hpan da ai arai langai mi mung n nga ai; yawng mayawng gaw shi myi a man e dan leng nga ai hte asan brang lang rai nga ai rai nna, anhte shi a man e jahpan dan lu na ga ai”.
- Na a salum chyinghka hpaw let, dinghpring ai myit hte Karai Kasang hpe saw shaga u. Ya aten hta nang kaning nga hkam sha ai kun? Nang shi a man e gara hku hkawm sa ai kun? Na a salum kata hta naw sin nga ai shara, makoi da ai daw ni naw nga ai kun, Chyoi Pra ai Wenyi hpe san yu u.
- Na a salum na ra kadawn dik shara hta, shi a tsaw ra ai hpe hkam la lu hkra, Chyoi Pra ai Wenyi kaw hpyi u. Lai wa sai aten ni hta, nang hpe grai na hkra machyi jung shangun dik ai shara ni hpe shi hpe madun dan u. Shamai shatsai ya ai hpe hkam la u.
Karai Kasang gaw, “Myit maku daw ai ni hpe shamai ya nna, Shanhte a nma ni hpe ahkang hkayawp ya mu ai” nga nna Shakawn Kungdawn 147:3 hta tsun da nga ai.
Anhte a salum ni machyi hkrum ai hpe Karai Kasang kaw na shamai shatsai ya ai hpe hkam la na matu aten jaw ai gaw, wenyi lam hta galu kaba rawt jat wa na matu ahkyak ai bungli rai nga ai.
Lai sai ten na wunma ni a majaw myit n mai daw ai.
Anhte a wunma ni hpe magap na matu mung n shakut ra ai.
Rawt galu kaba wa ai de sa ai langai sha re ai mahkrun gaw Karai Kasang a shamai shatsai ya ai shangwang de sit shang ai lam rai nga ai.
Chyoi Pra ai Wenyi a n-gun atsam hta shamai shatsai ya ai hpe hkam la ga.
Yawng hpe Karai Kasang shaman ya nna, bau sin ya nga u ga.
