Daini na anhte a myit sumru akyu hpyi ai lamang hta: God Wants to Use You (Karai Kasang Nang Hpe Asung Jashawn Mayu nga ai) ngu ai hpe jawm myit yu ga. Ehpesu 2:10 hta rawng ai mungga hpe shawng madat yu ga:
“Mai kaja ai bungli shachyen na, Hkristu Yesu hta e hpan da ai ni gaw, anhte rai nga ga ai: dai mai kaja ai bungli hta anhte hkawm nga u ga, Karai Kasang gaw dai ni hpe shawng nnan e lajang tawn da nu ai”
Daini na, anhte a Mungkan gaw Karai Kasang hpe hkyak hkyak nan ra taw nga sai. Dai majaw, Madu Karai Kasang gaw, shi a salum gaw kaning san ai re ngu ai hpe anhte chye la ai hpang, n mu mada lu ai shi
a shingra atsam a laklai ai, n’gun lapyin hpe mungkan de madun dan mayu nga ai. Shi hpe masha yawng hpang de shadan dan na matu anhte hpe lata la sai.
Anhte hpe shi a Wenyi hte jahpring ya nna, hkye hkrang la ai lam a Kabu Gara Shiga hpe ndau shabra nna, Karai Kasang hte masha a lapran na matut makai ai lam bai kaja wa hkra galaw na matu, n’gun atsam jaw ya ai. Ndai hte seng nna Ehpesu 2:8-10 hta San pawlu tsun da ai hpe madat yu ga,
“Makam masham a marang e, chyeju hte sha, nanhte hkye hkrang la ai hkrum manit dai: dai gaw nanhte kaw na n rai, Karai Kasng a kumhpaw kumhpa sha rai nga ai: kadai mung gumrawng shara n nga u ga, magam bungli kaw na mung rai nga ai n rai.
Kaning rai nme law, anhte shi a magam bungli rai nga ga ai; mai kaja ai bungli shachyen na, Hkristu Yesu hta e hpan da ai ni gaw, anhte rai nga ga ai: dai mai kaja ai bungli hta anhte hkawm nga u ga, Karai Kasang gaw dai ni hpe shawng nnan e lajang tawn da nu ai”.
Karai Kasang jaw ai chyeju gaw, htani htana asak hte seng ai kaja ai apu asi ni hpe shapraw lu hkra prat hpe galai shai shangun ai matsi rai nga ai. Anhte a shani shagu na amu bungli ni hpe, galaw ra nna galaw ai n re sha, sharawng awng ai, myit katu ai hte galaw nna, lachyum pru ai, ngang grin ai prat hpe gaw gap na matu rai nga ai.
Karai Kasang anhte hpe jai lang mayu ai ngu ai hpe chye madat na matu yak na re.
- Masha nkau gaw, tinang, mara grai lu dum, n’gun n rawng ai, tinggyeng akyu machyu ai, Karai Kasang e jai lang na matu n ging n dan ai ngu nna tinang hkrai sawn la dawdan la chye ga ai.
- Nkau mi bai rai jang, Karai Kasang gaw, shi ra ai hpe sha aja awa, adip arip rai nna shangun sha ai bungli hpareng wa hku nna mu ma ai.
- Nkau mi a matu bai rai jang, Karai Kasang hpe dawjau ai gaw, nau n pyaw ai, myit dik lam n nga ai, anhte galaw mayu ai hte grai nhtan shai ai hku bai mu la ma ai.
- Anhte gaw, anhte hpe ru yak jamjau lam ni kaw na shaw mawai la ai Karai Kasang rai jang myit dik sai ngu nna hkam sha chye nga ai.
Rai tim, tengman ai lam gaw: anhte tinang a hkum hpe Karai Kasang shi ra ai hku asung jashawn na matu n hkraw, n ap ya dingsa, myit dik kabu pyaw ai prat hpe n lu la na re. Ehpesu 2:10 hta, “Nang gaw, kaja ai bungli ni hpe galaw na matu Hkristu Yesu hta hpan da hkrum nit dai” nga nna shadum da nga ai.
Dai majaw, anhte jai lang na matu Karai Kasang jaw ya ai sha n rai yang gaw, mungkan sutgan ni pyi, nang hpe myit dik shangun na malai, lit li gun da nna n mai shamawt hkra gyit hkintum da ai sumri hte lit hte bung mat na rai nga ai.
Mungkan lam ni hta awng dang sut su na, masha yawng ra hkra galaw na, mungkan masha ni a myi hta htuk hkra, na a prat hpe hkan ai rai yang, nga-mu nga-mai ai chyeju hkam la na malai, ajin aban rai, dun gayin shakri ra ai jak hte bung mat na re. Chyeju hte hpring kabrat ai prat hpe ra sharawng ai rai yang, Karai Kasang tinang hpe jai lang na matu hkraw ya ra ga ai.
Karai Kasang nang hpe tsaw ra ai majaw she, nang hpe jai lang ai rai nga ai. Shi gaw, tinggyeng machyu myit n rawng ai, nang garum ya ai hpe mung shi n ra ai. Nang hte rau sha bungli jawm galaw mayu ai. Na a ahkying aten hpe mung, Karai Kasang a matu hte nye a matu ngu nna lajen ginhka da na hpe mung shi n ra ai. Shi hte matut manoi, rau hkawm, bungli jawm galaw, jawm kahkyin gumdin nga na, hpe shi ra ai.
Bungli hta rai tim, manaw manang ni hte rai tim, nawku jawng kata, mawdo gau hkang nga ai ten, hkring sa ban sa la ai ten, ginsup, kabu pyaw ai ten ni yawng hta shi lawm mayu ai.
Akyu hpyi sumru yu ga:
- Karai Kasng nang hpe jai lang mayu ai ngu ai hpe sumru yu u. Na a jet ai nsam hpe myit yu u; ya du hkra, na a lai wa sai ten hpe n re ai sha, chyum mungga tsun da ai hpe bai sumru yu u,
“Makam masham a marang e, chyeju hte sha, nanhte hkye hkrang la ai hkrum manit dai: dai gaw nanhte kaw na n rai, Karai Kasng a kumhpaw kumhpa sha rai nga ai: kadai mung gumrawng shara n nga u ga, magam bungli kaw na mung rai nga ai n rai.
Kaning rai nme law, anhte shi a magam bungli rai nga ga ai; mai kaja ai bungli shachyen na, Hkristu Yesu hta e hpan da ai ni gaw, anhte rai nga ga ai: dai mai kaja ai bungli hta anhte hkawm nga u ga, Karai Kasang gaw dai ni hpe shawng nnan e lajang tawn da nu ai” Ehpesu 2:8-10.
- Karai Kasang nang hpe jai lang ai ngu ai hpe nang gara hku hkam sha ai rai? Mai kaja a bungli ni hpe galaw na matu hte htani htana asak a matu mai kaja ai bungli ni hpe galaw ra ai ngu ai hte shabung na matu, na a prat hta hpa lam ni hpe naw sharai ra nga ai kun? Madu Yesu a lagaw nhpang e hputdi let tawngban hpyi nem u.
- Karai Kasang Nang hpe daini gara hku jai lang mayu ai kun, shi hpe san yu u. Shi a tsaw ra salum hpe kaga masha ni hpe shaleng dan na matu alak mi re ai lam, hpa rai na kun san yu u. Shi a mahtai hpe ala u. Nden ja ai myit hte kam sham ai chyeju hpe hkam la lu na matu, shi a shanu nga ai lam hta bansa la u.
Hpang Jahtum:
Kaja ai bungli ni hpe galaw shaman ai ngu ai gaw, prat ting na bungli rai nga ai. Karai Kasang nang hpe chyeju jaw nga ai. Ya aten hta nan, Karai Kasang nang hpe tsawra matsan dum nga ai.
Rai tim, nang du nga ai shara hta nan, nang hpe htani htana asak hte asi law law hkam la lu hkra nang hte hkrum kadup mayu nga ai.
Na a salum hpe galai shai ya na matu Karai Kasang hpe ahkang jaw u. Na a prat jut shingnaw shagu de Karai Kasang a chyeju hte matsan dum ai lam du chyam wa hkra, shang wa shangun u. Shi sharin ai hpe hkam la u, nang hpe galai shai shangun u, nang hpe masha nnan shatai shangun u.
Na a prat mung kabu gara ai, myit katu ai hte hpring kabrat wa u ga.
By – Cardinal Charles Bo
