Daini na Ja Chyum Mungga hpe hti sumru yu ai shaloi e, teng man ai sape hte Madu a mungga na nna, hkan galaw ai wa hte seng ai lam ni hpe na chye la lu na ga ai. Anhte a hpu nau Myen myu sha ni hta grai tsun chye ai ga malai langai mi gaw, N-gup gaw Karai Kasang, Karai Kasanag, ta tut gaw gaman lila hpa mung n kam hkan galaw ai ni hpe tsun ai rai nga ai. Daini chyum mungga hta e, Yesu Madu e nga nna tsun ai masha shagu Karai Kasang a mungdan de shang lu na nna, n-gup kaw tsun ai hte maren ta tut hta hkan sa galaw gun hpai na matu sha Kawa Karai Kasang ra sharawng nga ai re lam hpe shadum da nga ai re.

Anhte shinggyim masha ni hta e byin chye ai gaw, anhte ntsa lam galaw ai akyu hpyi ai, alu atan garum jaw ai, tsawra matsan dum garum shing tau ai lam ni hpe anhte a myit salum kata kaw na mai kaja ai teng man ai arawn alai myit kaja hte galaw ai n rai yang, atum n lawm ai mam nsi zawn, zaibru ntsa e gaw gap da ai dum nta zawn sha hten za mat na teng sha re ai lam Yesu gaw shi a kasa ni hpe tsun shadum da nga ai re. San pra ai Louis de blois kaw nna mung, nanhte ni aten man man ap nawng daw jau ai lam, n hkring n sa kyu hpyi ai, ra nga ai ni jaw lu jaw sha ai lam hpe man man galaw ai raitim, dai tinang kahpu kanau wa hpe jet ai tawra myit n tawn da lu ai rai yang, Karai Kasang a kasha jahpan hta n lawm lu ai lam shadum ya nga sai hpe madu a ra sharawng ai lam hta ta tut hkan sa ga law.