Daini na Ja Chyum Mungga hpe hti sumru yu ai shaloi e, mat mat ai sagu kasha ga shadawn hte seng ai kabu gara shiga hpe na la lu ga ai. Karai Kasang gaw shi a hkrang hte bung hkra hpan lajang da ai shinggyim masha ni a wenyi n mat hkra tut e makawp maga ya nga ai. Dai ni na chyum mungga hta sagu (100) kaw na langai mi mat mat yang, dai (99) hpe tawn da nhtawm, mat mat ai sagu langai hpe bai mu la hkra tam nna, kabu gara ai hte kahpa kaw mara nna, htingbu ni hte kabu gara poi galaw na re lam ga shadawn jaw da nga ai.

Bai (Lk 15:11-32) hti yu ai shaloi e mung, mat mat ai kasha kaji wa gaw, myit malai lu nna, shi kawa kaw bai n htang wa ai shaloi, kabu gara hkap tau la nna, poi galaw ya ai lam hpe na chye lu ga ai. Kawa Karai Kasang a mara lu ai ni yawng a ntsa tawn da ai, shi a kaba la ai tsawra myit grai dan dawng nga ai. Shingrai Karai Kasang gaw dingman ai ni a matu n rai, myit malai lu ai mara kap ai ni hpe tam nna, hkye hkrang la na matu du sa ai, kaba dik la nga ai Karai tsawra myit hpe bai dum la nna, shi kaw myit malai kaba hte, gayin wa na matu shut hpyit mara lu ai ni anhte yawng hpe tsun n dang hkra tsawra matsan dum chye ai, Wa Karai hpe chyeju dum manu shadan sak hkrung nga sa ga law.