Daini na chyum mungga hpe hti sumru yu ai shaloi e, Yesu a hpang hkan nang mayu ai ni, tinang a hkum hpe nyet kau ra ai lam na chye lu na ga ai. San pra ai Crossotune gaw  sumsing lamu hpe shawng n tam nna, mungkan ga hpe tam ai ni marai shagu gaw, dai mungkan ga hte sumsing mugdan lahkawng yan hpe teng sha sum mat na re. Daini na mungga hta, Madu Yesu gaw, shi a hpang hkan mayu ai rai yang, mungkan ga hte dai arung arai ni hta sha ra marin ai lam hpe kabai kau ra ai lam, masha ni hkye la ai lam lu la na matu, tinang a manu dan ai ahkying ten ni hpe ap nawng daw jau ra ai lam, madu shi a hpang hkan nang na rai yang, kaba la ai  manu shabri shabrai ni ap jaw daw jau ra ai lam ni, shi hkum nan pi Baw jahkrat na shara n`lu ai lam tsun da nga ai.

Prat dep galu kaba wa ai ndai tsa ban (21) hta, nga pra ga ai anhte shinggyim masha ni wa, agrin nga ai sut gan hta, n grin ai mungkan sut gan ni hta chyu sha myit jung pyaw len taw nga nna, Madu Yesu ra sharawng ai sumsing sut gan hpe shawng tam mahkawng na malap mali rai len pyaw taw nga ma ai nga nna, shadum ya nga taw ai. Dai majaw anhte ni, ndai mungkan hta jahkring mi sha sa pra ten hta e, sumsing  mungdan lam hte seng ai hpe ra sharawng chye na matu, Karai a mungga hku nna myit jasu ya ai hpe dum shai let, tinang a asak prat hta, manu dan ai aten ni hpe, Karai Kasang a mungdan a matu, dinghta ga ntsa hta e, sak hkrung nga ai ten ni hta, kaja dik ai hku hkyen lajang shajin sa wa ga law.