Daini na Ja Chyum Mungga hpe hti sumru yu ai shaloi e, Mahte hpe Yesu shaga la ai lam hpe na la lu ga ai. Shinggyim masha hta galai shai ai lam ni ninggam masum nga nga ai. Dai gaw, ningnan hpang ai, kaang hte ngut kre ai lamni rai nga ai nga nna, Pope the great of Gregory tsun lai wa ai rai nga ai. Shawng n`nan e gaw, galai shai ai ni pyaw ngawn ai nam chyim a shingwang hpe hkam sha lu ai nga wa sarabyin tsun ai hte maren, kabu gara shiga na la lu ai ahkun hkan se hta ai wa, Mahte mung galai shai ai lam a ningpawt re ai Madu Yesu a shaga la ai nsen, Nye a hpang hkan nan rit ngu ai pyaw ngawn ai nsen hpe na la sai.

Shi dum nta masha ni mara a mayam byin taw nga ai mabyin kaw nna, Madu Yesu a hpang hkan nang ai sape kaja langai mi byin wa sai. Dai hta n-ga, mara lu ai ni hpe lachyen ginhka re ai makau grupyin byin taw nga tim, mara raw ya chye ai Karai Kasang gaw, mara lu ai ni hpe grau tsawra manu shadan nga ai. Anhte yawng kadai mung mara shut ai lam kaw na n tawt lai lu nga ai. Madu a matsan dum lama ai lam a majaw, mara shang wang kaw na tawt lai let, shada da n ginhka ai sha, tsawra myit majing hte kanawn mazum lu yang chyu sha, anhte yawng mung hkum zup ai shang wang kaw nga sa hkam la lu na teng sha rai nga ai. Dai hkum zup ai prat hta sak hkrung nga lu hkra tut shakut sa nga ga law.