Myitkyina Kahtawlik Sasana Sagurem wa, Wa Saradaw John Mung Ngawn La Sam hte Wa Jau kaba Dr. Peter Hka Awng Tu ( Vicar General) yan gaw 29 June 2025 ya shani Danai Muklum Kinsara Lawk kaw hpaw tawn da ai St. Joseph Hpyen Yen Dabang de sa du kawan nna hpyen koi yen, tsin-yam hkrum nga ai Nu Wa hpu nau ni hpe ninggun jaw, hpaji jaw ga ni tsun ai hte akyu hpyi shaman da ya ai.
Danai St. Joseph hpyen yen dabang hpe 2017 ning hta Nam Hkam maga de na majan a majaw htawt sit wa ai hpyen koi yen masha ni a matu nga shara lajang ya nna hpaw hpang da lai wa ai. Dai hpang 2018 ning April shata hta Danai, Awng Lawt maga de majan bai byin wa ai majaw hpyen yen hprawng wa ai ni hpe shingbyi shara jaw ai hpyen yen dabang rai nga ai.
St. Joseph hpyen yen dabang hta RC, KBC hte Anglican nawku hpung masha ni lawm ai rai nna ya ten hpyen yen masha jahpan ( 622 ) tup naw nga ai lam chye lu ai. Maning 2024 ning hta marang kaba htu nna sin hkrat ai majaw hpyen yen dabang na dum nta hpri tsut yawng baw kayun mat ai rai nna ya ten plastic hte sha galup nna rawng ra ai masa rai taw nga ai.
Hpyen yen dabang de shawng du shang wa ai Nam Hkam hpyen yen htinggaw ( 30 ) hpe gaw Ngwi Pyaw Mare ngu ai mare ningnan de nna htawt sit nga shangun sai. Majan byin ding yang naw rai nga ai hte dum nta buga de bai wa nga ahkang n lu ai, dum nta buga de bai wa nga na yak hkak lam ni law law naw rai nga ai lam Dabang lit hkam Sara Joseph Nhpang Naw Tawng tang madun dan ai kaw na chye lu ai.
Shiga – Julia Ja Ing
