Wa Sarabyin Leo gaw shi a Laban shani na Angelus mungga hta, mungkan ting hpe sasana amu galaw na matu saw shaga la ai lam hpe myit sumru yu let, Hkristan ni hpe kalang marang sha shang lawm ai, makam masham hta lai nna, shani shagu na sak hkrung lam hta ap nawng ai sakse ni tai wa na matu tsun shadut dat ai.
Wa Sarabyin Leo gaw, July praw 6 ya laban shani, Angelus akyu hpyi na matu zuphpawng nga ai hpung masha ni hpe, San Luka a Kabu Gara Shiga hpe la kap nna, Nawku hpung a sasana magam bungli hte seng ai lam hpe myit sumru yu let tsun shaga lai wa ai.
Wa Sarabyin gaw, Yesu a sape marai sanit shi lahkawng hpe shangun dat ai lam hpe madung tawn nna, dai amu gaw, Kabu Gara Shiga mungkan ting hpe madi madun ai lam re, nga nna shi sang lang dan ai. “Kabu Gara Shiga a myit mada yaw shada ai lam gaw amyu bawsang yawng a matu rai nga ai” nga nna tsun let, ndai gaw “Karai Kasang a myit masin, salum galu kaba ai lam hte Shi a dam lada law htam ai Sasana magam hpe madun dan ai” nga nna tsun ai.
Wa Sarabyin Leo gaw, Yesu a ga hpe lakap nna matut tsun ai: “amu shang na shara law law nga ai, raitimung, amu galaw ai ni gaw n law nga ai.” Dai ni na Mungkan gaw myit bra, pu ba ai lam ni hte hpring chyat nga ai zawn rai tim, dai ni aten na masha ni gaw “jet ai tengman ai lam hpe ra sharawng nga ai”, tara rap ra lam hpe tam nga ai, “htani htana asak hpe ra sharawng ai myit ni rawng nga ma ai ”lam hpe sang lang dan ai.
Wa sarabyin gaw Karai Kasang hpe nli gat ai wa the shabung da nga ai. Nli gat ai wa gaw pru sa wa nna, masha ni a myit masin hta “n htum n wai ai hpe ra sharawng ai myit, hpring tsup ai asak hkrung lam hte anhte hpe lawt lu shangun ai hkye hkrang la ai lam hpe ra sharawng ai” n li hpe gat bang ya ai. Raitim, “Yesu a myi hte, dan la na matu nai mam kaja hpe chye ginhka lu ai ni gaw taw nga ai.”
Makam masham hte bungli galaw ai wa tai nga u.
Makam masham gaw “mu lu ai shinggan masat kumla sha” n rai uga matu, Wa Sarabyin sadi jaw da ai. Nawku hpung hte mungkan ting ra sharawng ai gaw, kalang marang shang lawm ai ni n rai, “sasana magam bungli hta shakut shaja na matu myit rawt ai amu galaw masha ni, Karai Kasang a Mungdan hpe shara shagu hta sakse hkam ai tsawra myit rawng ai sape ni” rai nga ai.
“Kalang marang nawku htung nkau mi hpe hkan sa ai (sh) lamang n kau ni hta shang lawm ai, aten kadun hta sha shanglawm ai Hkristan ni law law nga na re” ngu yin la ai, raitim, “Karai Kasang a dam lada ai Sasana magam hta shani shagu bungli galaw na matu” jin jin rai nga ai ni gaw n law nga ai.
Ndai sasana magam bungli hta “sasana masing hte seng nna grai law ai theoretical ideas” n ra ai. De a malai, “anhte gaw dan la ai Madu kaw akyu hpyi ra ai” ngu nna Wa Sarabyin Leo ahkyak shatai tsun ai. Madu hte tinang a tawra hku hkau lam hta galu kaba wa hkra shakut ai rai yang “Shi a Mungdan lam hpe sakse hkam na matu, mungkan de” shangun dat na matu jin jin rai nga ai, tengman ai bungli galaw masha ni tai wa shangun ai, nga nna matut tsun ai.
“hkye hkrang la ai magam bungli hta shang lawm na matu, Karai kasang hpe ‘yes’ jaw ya ai, Chyoi Pra ai Nu Maria kaw kam hpa hpyi nem ga rai yang, Madu a hpang hkan nang ai lam hta anhte hkan nang lu na matu, Karai Kasang hta kabu gara ai, Karai kasang a amu bungli galaw ai ni tai wa lu na ga ai ngu nna Wa Sarabyin shi a mungga hpe hpung dim dat let, hpung masha yawng hpe saw shaga da nga ai.