Htai Ya Ai Wa- Wa Jau Dr. Joseph Gawlu Yung Wa

Ga San – Kalang myi htam shi ngu san da nna, dai hpe bai la lang kau yang mara lu na kun?  Htam shi a lachyum hpe naw tsun dan ya rit; manang ni san wa ai shaloi chye tsun dan na matu.

Htam-shi a lam hpe shawng kadun ai hku hka ja yu ga:

Jaw Jau Laika (27:30) hta: Karai Kasang gaw shi a Amyusha ni hpe lamu ga nnan jaw da sai majaw, chyeju dum ai hku nna, shaning shagu nsi naisi ni ma hkra kaw na htam-shi jaw na matu matsun da nga ai. 

Shaning shagu jaw ra ai nga nna (Tara Jahprang 14:22) hta matsun da ai.

Dai gaw, shanhte hpe up hkang nga ai Jau Hkyinjawng ni a matu re nga nna (Bu Hkawm 18:26) hta tsun da ai. 

Amyusha ni, shanhte lu ai yawng mayawng a 1/10 hpe kabu gara ai hte jaw ma ai, nga nna (2Hkawhkam Labau 31:5) hta tsun da ai.

Htam-shi a yaw shada lam gaw, Jau hkyijawng ni a matu, nawku htingnu hpe yu gawn ai hta lang na matu, matsan mayan ni hpe garum na matu rai nga ai.

Ga Shaka Ningnan hta:

Madu Yesu gaw “htam-shi bang na bang ra ai” ngu nna gaw n shadut ai.  Raitim, tinang lu ai sutgan ni hta na htap htuk hkat hkrang ai hku jaw na matu n-gun jaw ai.    Matthew 23:23 hta Yesu tsun ai “hta-shi bang ai zawn, dinghpring ai, matsan dum ai, kam sham ai lam ni hpe mung hkan shadik ra ai nga nna sharin ya ai.

Anhte hpabaw alu jaw ai raitim, awng sharawng ai, kabu gara ai shawang myit the jaw ra ai nga nna San Pawlu (2 Corinthians 9:6-7) hta sharin ya ai.  Grau nna lusu nga mai ai ni grau shakut ra ai lam (1 Timothy 6:17) hta San Pawlu sharin ya ai.

Ga shaka Dingsa na tara gaw anhte hpe myit n mai kataw shangun ai. Ndai daram rai yang gaw, nang htam-shi bang na ngu nna san da ai hpe bai jai lang kau ai gaw mara rai kun, n rai kun ngu ai hpe lu daw dan la na sai.

San Ai Wa — Nmawk Jau ginwang, Goi Kahtawng Zaibru yang kaw nga na ya sum tsan kaw du taw nga ai Fransica Jangma Bawk Ja