(Let us imitate Christ, the Good Samaritan)

Wa Sarabyin Leo XIV gaw, Castel Gandolfo mare na Villanova San Pra ai Thomas a Nawku Jawng hta, Laban Missa hkungga hpe nawng jau lai wa ai. Dai missa hkungga na mungga hta  wa srabyin gaw, Kaja ai Samari masha ga shadawn hpe myitsawn sumru yu let, Karai Kasang a tsawra myit hte shamai shatsai ai lam hpe hkam sha lu ai shaloi, anhte hkrum katut ai zawn kaga masha ni hpe mung, dai zawn shalan shabran lam jaw lu ai lam hpe shadum ya lai wa ai.

“Anhte Hkristu a tsawra myit hpe hkam la lu ai, shamai shatsai ya ai shaloi, anhte mung anhte grupyin hta Shi a tsawra myit hte matsan dum lama ai lam a sakse ni tai wa lu na re.”

Wa Sarabyin gaw dai kaw du hpawng nga ai hpung masha ni hte rau missa hkungga hpe rau jawm nawng lu ai majaw kabu gara chyeju dum ai lam hpe tsun dan let, du sa du ai ni yawng hpe  shakram lai wa ai. Dai hpang Wa sarabyin  gaw, ndai Laban shani na Kabu Gara Shiga hta, San Luka tsun da ai  “Yesu a tsaw dik htum ai hte myit rawt shangun ai ga shadawn langai mi hpe anhte na lu ga ai,” Kaja ai Samari masha ga shadawn shadawn gaw, “anhte a prat hpe myit yu na matu galoi mung shadut ya ai,” “anhte a yup pyaw nga ai (sh) myit bra mat ai makam masham hpe myit yu shangun ai,” n tsa lam tara hpe hkan sa ai hta myit dik ga ai raitim, Karai Kasang zawn matsan dum lama ai myit hte galaw lu na yak nga ga ai.”

Kaga masha ni hpe anhte gara hku yu ai gaw ahkyak nga ai.

Wa Sarabyin Leo tsun ai hta, Ndai ga shadawn gaw,  teng sha matsan dum lama ai lam hte seng nna, hpung masha ni hpe tsun ai, “anhte kaga masha ni hpe gara hku yu ai gaw ahkyak ai, hpa majaw nga yang, dai gaw anhte a myit masin kata kaw nga ai hpe madun dan ai.”

“Anhte gaw yu nna hkawm sa lu ai, shing nrai, anhte gaw yu nna matsan dum myit rawng wa lu ai,” nga tsun ai, ndai ga shadawn gaw Karai Kasang anhte hpe mu mada ai lam hpe shawng tsun dan ai, ” anhte mung shi a myi hte masa lam ni hte masha ni hpe gara hku mu lu na hpe sharin la lu na matu, tsawra myit hte matsan dum myit hte hpring tsup ra nga ai.”

Kaja ai Samari masha wa gaw, teng sha Yesu rai nga ai, “Kawa gaw shinggyim masha ni hpe matsan dum myit hte yu nna, anhte a hkye la ai  labau de shangun dat ai htani htana Kasha re” nga nna shi bai myit dum wa ai.

“Kabu Gara Shiga hta lawm ai masha wa gaw Yerusalem kaw nna Yerihko de yu wa ai wa zawn, “Anhte a prat hta mung, n hkru n kaja ai lam, nni nkri hkrum ai lam, matsan mayan hkrum ai lam hte si hkrung si htan lam a nsin hpe anhte hkrum katut ra ai” nga nna tsun ai.

Shi a tsawra matsan dum lama ai hte ningma ni hpe shamai ya ai

Wa Sarabyin gaw, “Karai Kasang gaw anhte hpe matsan dum myit hte yu nga ai; anhte lam langai sha hta hkawm sa nna, anhte a lapran de yu hkrat wa mayu ai. Kaja ai Samari masha Yesu hta, anhte a ningma ni hpe shamai ya na matu hte shi a tsawra myit hte matsan dum lama ai tsi hpe anhte a ntsa e ru jaw na matu du sa ai,” ngu nna tsun ai.

Shi gaw, n nga mat sai Wa Saradaw Francis a ga hpe la kap nna, Karai Kasang gaw matsan dum lama ai hte tswra matsan dum chye ai wa re hpe, bai dum shangun ai. “Ndai ga shadawn gaw anhte langai hte langai a matu hpa majaw grai yak hkak ai hpe anhte chye na la lu ai,” Hkristu gaw matsan dum chye ai Karai Kasang a myi man hpe anhte hpe madun dan ai rai yang, Shi hpe kam sham nna Shi a sape tai na ngu ai gaw, anhte hkum anhte galai shai wa na ahkang jaw ai lam rai nga ai.”

Shamu shamawt ai myit masin salum

Wa Sarabyin tsun ai hta, shamu shamawt chye ai myit masin gaw, mu lu ai myi hte kaga masha ni hpe garum shingtau nna ningma ni hpe shalan shabran ya lu ai lata, ra kadawn nga ai lit hpe gun hpai lu ai lahpa ni hpe sharin la na ngu ai lachyum rai nga ai.

“Kaja ai Samari masha Hkristu gaw anhte hpe tsawra nna, lanu lahku nga ai hpe anhte a myit masin kata kaw nna chye na ai rai yang, anhte mung Shi zawn tsawra myit hte matsan dum chye ai ni tai wa na re” nga nna tsun ai.

“Anhte hpe Hkristu tsawra myit the shamai shatsai ya ai hkrum jang, anhte mung anhte a grupyin hta Shi a tsawra myit hte matsan dum lama ai lam hpe sakse hkam lu na re” nga nna Wa Sarabyin Leo matut tsun ai.

“Anhte hpa galaw na kun?”

“Anhte gaw yu nna hkawm sa ai kun, shing nrai, Samari masha zawn, kaga masha ni hpe anhte a myit masin hpe hpaw ya ai kun? Kalang lang anhte a lit hpe gun hpai na matu sha myit dik nga ai kun, shing nrai, anhte a hpung hta lawm ai, anhte zawn myit ai, anhte hte amyu langai sha, nawku htung langai sha re ai ni hpe sha htingbu hku mu mada ai kun?”

“Yesu gaw ndai myit masa hpe myit yu na matu, hkala nba hkrum ai wa hpe gawn lajang ai Samari masha langai, maigan masha langai mi (sh) tara maigan wa hpe anhte hpe madun dan ai,” “anhte hpe mung dai zawn galaw na matu saw shaga nga ai.”

Hkristu hpe kasi la ga.

“Anhte a prat a n-gun ja ai hpe jahkring kau ai, kaga masha ni a prat hpe, shanhte kadai rai tim, shanhte a ra kadawn ai lam ni hte yak hkak ai lam ni gaw anhte a myit masin hpe hkra machyi shangun ai,” nga nna Wa Sarabyin tsun ai, “bai nna, anhte hpe shada da htingbu shatai ya ai, tengman ai hpunau tsawra myit hpe shabyin ya ai hte, bunghku ni hpe jahten kau ya ai. N hkru n kaja ai hte si hkrung si htan hta grau atsam rawng nga ai.”

Hpang jahtum Wa Sarabyin Leo XIV gaw “Anhte gaw Kaja ai Samari masha Hkristu hpe mada yu nga ga. Shi a nsen hpe dai ni bai madat mara nga ga. Kaning rai nme law, Shi gaw anhte langai hte langai hpe, ‘Sa mu, dai zawn galaw mu’ nga nna tsun nga ai.”