Yesu Hkristu shi a mungga hte anhte hpe sharin shaga ai ten hta mungkan lam, sumsing mungdan a lam, Karai Kasang a lam ni hpe ga shadawn hku nna law law hkaw tsun mat wa sai rai nga ai.

Kawa Karai Kasang a tsawra myit hpe grau chye na lu na matu dam mat wa ai kasha a ga shadawn mabyin hku nna mung, htingbu wa hpe grau nna tsawra hkungga lu na matu Samari masha langai mi damya hkrum ai wa hpe garum shingtau ai ga shadawn hku nna mung, Karai Kasang a mungga hpe hkap la hkan nang hkan sa let sak hkrung hkawm sa ai lam hta lu la lu ai akyu chyeju ni hte seng nna nli gat ai ga shadawn hku nna mung ndai zawn re ai ga shadawn mabyin law law hte anhte hpe sharin shaga lai wa sai re.

Madu Yesu ga shadawn law law hte hkaw tsun ai a marang e anhte hkam la lu ai akyu chyeju ni gaw dai ga shadawn mabyin ni hpe atsawm sha matsing sumhting la lu ai hte manaw manang ni hpe bai garan kachyan na matu loi ai lam rai nga ai.