Anhte shinggyim masha ni yawng gaw Karai Kasang a kashu kasha ni sha rai nga ai. Shi hpan da ai amyu ni sha rai nga ai. Dai rai yang yawng hkye hkrang la ai hkrum lu na kun?

Lama wa hkye hkrang la ai chyeju hpe shinggyim masha ni yawng maren mara hkam la lu ai rai yang anhte ni shakut shaja na lam n ra nga ga ai. Shagrit shanem na lam n ra nga ga ai. Shakut shaja ai ni hte n shakut n shaja ai ni lu la ai akyu chyeju maren sha re ai majaw rai nga ai.

Raitimung daini na kabu gara shiga hta Madu Yesu Hkristu anhte hpe shadum ai hta sumsing mungdan hta shinggyim masha shagu shang lu na n rai nga ai.

Karai Kasang myit ra ai hpe hkan nang hkan sa ai ni, shagrit shanem ai hte shut hpyit mara hta na myit malai lu ai ni, tsawra myit rawng ai hte matsan dum chye ai ni, myit masin san seng san pra ai ni, ma kaji langai zawn kam sham myit rawng ai ni, hka hte chyoi pra ai wenyi e bai shangai hkam la ai ni, ndai zawn re ai ni hkye hkrang la ai lu la mai ai lam chyum laika hta anhte mu lu nga ga ai.