Daini gaw, Chyoi Pra ai Wenyi hte rau akyu hpyi ai lam hpe jawm hkaja na ga ai.  Ndai myit sumru akyu hpyi ten hta  nanhte a Hpan Da Madu a nsen hpe na lu myit ga ngu nna akyu hpyi ya nngai.

Anhte malawng maga gaw, ndai mau na zawn re ai “Chyoi Pra ai Wenyi hte rau akyu hpyi ai lam hpe” rai n chye ai, asung n chye jashawn shi nga ga ai.  Chyoi Pra ai Wenyi hte rau akyu hpyi ai gaw anhte, Karai Kasang hte matut mahkai hkat ai lam rai nga ai.

Karai Kasang gaw, shi a Amyusha ni a akyu hpyi nsen hpe htan ya na matu ra sharawng nga ai.  Shi gaw, Adam a kyu hpyi ai hpe madat ya nna, shi hpe garum na, shi a nrum ntau tai na Eva hpe jaw ya ai. 

Abraham a akyu hpyi ai hpe madat ya nna, Lot hte shi a nta masha ni hpe hkye la ya sai.  Moshe a akyu hpyi ga hpe madat nna Shi a Amyusha ni hpe mayam prat kaw nna hkye mawai la sai.  

Myihtoi Eliah a akyu hpyi ga hpe madat ya nna, lamu de na wan jahkrat dat ya nhtawm, tawn hkungri na hkungga hpe nat ya sai. 

Hkye La Madu du sa na matu hpyi ai akyu hpyi ga hpe madat ya nna, Shi a Kasha Shingtai hpe mungkan ga de shangun dat ya sai. 

Madu Yesu si hkam ai a marang e, anhte hpe garum shingtau ya na matu, Chyoi Pra ai Wenyi hte anhte hpe jahpring ya sai.  Dai Wenyi gaw, anhte hpe lam woi ya na hte n’gun atsam jaw ya na matu sha n rai, anhte hte rau akyu hpyi na hpe mung ra sharawng nga ai.

San Yuda tsun ai:

“Nanhte chyawm gaw, tsaw ra ai ni e, dai Chyoi Pra ai Wenyi hta akyu hpyi let, anhte a chyoi pra ai makam masham lam hta, tinang dai shangang shakang nga mu; n htum n wai asak lu la hkra, anhte a Madu Yesu Hkristu a matsan dum ai lam hpe ala nga let, tinang dai, Karai Kasang a n-gaw nwai ai myi hta anga nga mu”. ( Yuda 1:20-21)

Karai Wa gaw, anhte shi hpang de akyu hpyi yang, Chyoi Pra ai Wenyi hte rau hpyi na matu sharawng nga ai; dai gaw mauhpa chyeju rai nga ai.  

Karai Kasang a sunghtum ai lam ni hpe sawk tam ai Wenyi gaw anhte akyu hpyi ai shaloi garum ya mayu nga ai.  Shi gaw Karai Kasang myit ra ai lam ni hpe anhte kaw hpaw dan nna, anhte a masa lam ni, kanawn mazum ai lam ni, byin mai ai ahkaw ahkang ni hta hkan nna Karai Kasang Wa ra sharawng ai hte maren chye hpyi na matu garum ya mayu ai.

Anhte Chyoi Pra ai Wenyi hte akyu hpyi ai rai yang, Karai Kasang myit ra ai hte maren hpyi nga ga ai.  Wenyi hte rau akyu hpyi ga yang, Wa Karai shi ra ai hte maren galaw na matu hpyi nga ga ai.  Anhte gaw Karai Kasang a kashu kasha ni rai nga ga ai majaw, shi Kawa ra sharawng ai lam ni hpe Chyoi Pra ai Wenyi hku nna sawk dinglik yu nhtawm, dai lam ni hpe hkan galaw ra ga ai.

Mahte 21:22 hta Madu Yesu tsun da ai: “Kam sham ai myit hte nanhte hpyi mahpyi mahkra hpe, nanhte lu la na maru ai”.

Roma 10:17 hta Kasa Pawlu tsun da ai: “Dai rai nna, kam sham ai gaw, na la lu ai kaw na, na la lu ai mahtang gaw Hkristu a Mungga a majaw pru wa ai”.

Anhte hpyi ai hpe Karai Kasang teng sha jaw na re ngu nna hpring tsup ai makam masham hte hpyi ra ai nga nna Chyum Mungga hta tsun da ai. Dai makam masham gaw Mungga hta hpang nga ai.

Akyu hpyi ai ngu ai gaw Karai Kasang myit ra ai lam hpe anhte chye na, hkawn hkrang nhtawm, dai lam dik wa na matu kam sham myit kaba hte hpyi ai rai nga ai. Karai Kasang gaw shi a ga sadi ni hpe galoi mung shadik ya ai. Grau nna, anhte hpa lam a matu mung n chye hpyi ai aten hta Chyoi Pra ai Wenyi a madai ai nsen hpe kam shamyet mai nga ai.

Dai lam hpe Roma 8:26 hta San Pawlu tsun da ai:

“Dai hte maren, dai Wenyi mung anhte a gawng run gawng tsang ai hpe lanu lahku ya nga ai: kaning rai nme law, akyu hpyi mai ai hte maren anhte n chye hpyi nga ga timung, dai Wenyi nan n-gup n hkawn lu ai kraw madai ai hte, anhte a matu hpyi htinglu ya mi ai”.

Chyoi Pra ai Wenyi, na a matu akyu hpyi ya nga ai; na a malai akyu hpyi ya nga ai hpe chye nni?  Shi nang hpe tsaw ra dik ai majaw, nang hpe garum ya na matu shi Karai Wa kaw hpyi garum ya ai. Chyeju ningsang hte nhpaw n-ya hpring tsup ai asak a hkrun lam hta nang hkawm sa lu na hpe shi ra sharawng dik nga ai majaw, nang akyu n chye hpyi yang pyi, Chyoi Pra ai Wenyi gaw na a malai Wa Karai kaw hpyi garum ya nga ai.

Karai Wa jaw ai chyeju a matu nang chyeju n dum nni?

Shi nang hpe tsaw ra ai majaw, nang hte rau, nang hpe akyu hpyi garum na matu Shi a chyeju hku nna  Chyoi Pra ai Wenyi hpe nang kaw jaw ya sai.  Dai gaw mauhpa hte atsam kaba rawng ai kumhpa nan rai nga ai. 

Akyu Hpyi Ga:

1. Chyoi Pra ai Wenyi gaw nang hte rau akyu hpyi nna, na matu htinglu ya mayu nga ai lam hpe sumru yu u.  Roma 8:26-27 hpe bai hti sumru yu ga:

“Dai hte maren, dai Wenyi mung anhte a gawng run gawng tsang ai hpe lanu lahku ya nga ai: kaning rai nme law, akyu hpyi mai ai hte maren anhte n chye hpyi nga ga timung, dai Wenyi nan n-gup n hkawn lu ai kraw madai ai hte, anhte a matu hpyi htinglu ya mi ai.

Kraw lawang e sawk yu ai Wa chyawm gaw, Wenyi a myit, hpa rai nga ai gaw chye ya nga ai: kaning rai nme law, Karai kasang ra ai hte maren, chyoi pra ai ni a matu mara shi hpyi htinglu ya nga ai”.

• Nang akyu hpyi mayu ai lam hpa mi rai rai, na a myit masin hta Karai Wa ra sharawng ai lam ni hte jahpring ya na matu Chyoi Pra ai Wenyi kaw hpyi u.  Nang rai n shaga yang, shawng madat la u.

• Chyoi Pra ai Wenyi nang hpe hpaw tsun dan ai hte maren akyu hpyi u. Nang hpe shadan dan ai lam re ngu nna nang hkam sha ai hpe shadik ya na matu Karai Wa kaw akyu hpyi u.  Nang hpyi ai lam yawng hpe shi kaja dik ai hku shaman ya na re ngu nna kam sham let shi hta ban sa la u.

Hpa majaw nga yang, Mt. 21:22 hta’ “Dai hta kaga, kam sham ai myit hte nanhte hpyi mahpyi mahkra hpe, nanhte lu la maru ai” nga nna Yesu tsun da nga ai.

Hpang Jahtum hku nna:

Karai Wa gaw, Hkristan prat ngu ai hpe anhte shadu ai shayak ai hta grau asan sha, loi hkra galaw mayu ai. Anhte malawng maga shadu ai gaw anhte ra sharawng ai lam ni hpe Karai Kasang kaw hpyi dat nna, dai anhte hpyi dat ai hte maren anhte a shani shagu na prat hta shabyin ya na re ngu nna shadu ga ai.

Rai tim, Karai Kasang gaw dai hku n rai nga ai.  Anhte rai n hpyi yang pyi, shi anhte hpe galaw shangun mayu ai, byin shangun mayu ai lam ni hpe shajin da chyalu rai nga ai. Dai lam ni hpe anhte akyu hpyi let chye la nna kam sham kabu gara ai hte hkan galaw na hpe shi ra sharawng nga ai.

Anhte Karai Kasang a hpang e myit masin asan sha rai, n-gun atsam mahkra hte hkan nang ga ai rai yang, ngwi pyaw awng dang ai shaman chyeju shi anhte hpe jaw nga ai.  Dai majaw anhte langai hpra a matu Karai Wa ra sharawng ai lam gaw hpa rai kun ngu ai hpe sawk tam la ga.  Shi sadi dung nga ai hpe kam let akyu hpyi ga.

By: Cardinal Charles Bo