Nu Wa  hpu nau ni hkam sharang ai, mara raw ya ai hte tsawra myit gaw, n nga n mai ai, hkan sa shadik ra ai mai kaja lam nan re. San pra ai Maximilian gaw Franciscan uhpung na jau langai re. Shi gaw Nu Maria hpe grai kam hpa hpyi ai majaw, shi a sasana hta grai garum ya ai hte lak lai ai hku awng dang lam lu la nga ai. Shi Miwa mung de du hkra sasana magam gunhpai lai wa sai. Hpang jahtum e Nazi ni rim la ai hkrum nna htawng de sharen da hkrum sai. Dai hkyuk htawng kaw e lu sha shakyet si mat na matu sharen da hkrum ai masha langai nga ai.

Dai masha langai hpe hkye la na matu shi asak hpe ap nawng kau ai. Daini na chyum laika daw (1) hta Karai Kasang gaw Isael masha ni hpe Jordan hka hpe rap ai shaloi hkun hkraw ai ga hta hkawm lu ai zawn, San pra ai Maximilian mung tsawra myit hpe arang da nna, shi a asak hpe ap nawng let, kaga wa a asak hpe hkye la ya sai. Shi Madu Yesu hpe kasi la nna shi a asak hpe ap nawng let kaga wa a asak hpe hkye la ya sai. Kasa Petru gaw, Madu e anhte a hpu nau ni a mara hpe gade lang raw ya ra na kun, ngu Yesu hpe san dat nga ai. Karai Kasang gaw Shi a mara raw dat ya ai kasi hpe yu la hkan sa na matu, San pra ai Maximilian hpe kasi madun da ai zawn, anhte yawng hpe saw shaga nga ai.