Majan a majaw Namti, Jumdwi jak wang, St. Theresa hpyen koi yen dabang kaw shanu shingbyi nga ai Lawa Jau Giwang na hpyen koi yen taw nga ai nawku hpung masha ni hte rau ( 10 August 2025 ) ya shani Myitkyina Sasana Sagurem wa, Wa Saradaw John Mung Ngawn La Sam Laban Missa Hkungga sa du nawng jau ya ai.

Wa Saradaw hte rau Lawa ginwang up Wa Jau Peter Lazum Naw Bawk, Saradaw rung a amu madu Wa Jau Jerome Ndaing La Raw yan mung Missa Hkungga hta shang lawm nawng jau ai.

Hpyen koi yen masha htinggaw ( 300 ) jan shingbyi nga ai St. Theresa hpyen koi yen dabang hta marang htu ai majaw hka kaba nna, nga shara dum nta ni hka lim hkrum ai. Ya na zawn hka kaba, hka lim ai gaw ndai kalang sha n re, chyahkring hkring sha byin ai. Ndai zawn nga shara, dum nta ni hka lim hkrum ai majaw nga shara yak hkak ai, shadu lu, shadu sha na yak hkak ai lam ni hkrum sha nga ai. Machyi makaw hkrum ai masha ni law ai lam hpyen koi yen masha ni tsun dan ai.

Wa Saradaw John La Sam a ninggun jaw mungga hta:

Ya daini anhte grai yak hkak nga ai. Hka Ntsa kaw Missa Nawng  ra ai.  Wa Saradaw a prat hta mung hka ntsa kaw Missa Nawng ai No ( 1 ) lang re. Ndai zawn re ai aten hta anhte myit n pyaw, myit yawn nga na malai, Karai Kasang gaw anhte hpe hka sang hpaw ntsa kaw shajawn nna akyu hpyi bu hkawm woi ai ngu hkam la ga.

Moi lai mat wa sai 2000 jan ning hta e Kasa Petru hte rau shi a Sape ni sang hpaw kaba re ai kaw Madu Yesu hte rau akyu hpyi bu hkawm ai. Daini anhte mung sang hpaw ntsa kaw e akyu hpyi bu hkawm ai hte shabung nna Madu Yesu hte rau nga re ai hpe myit dum nna shaman chyeju hpyi la ga. Anhte a kashu kasha ni hpe mung grai kaja ai labau mau mwi jaw da lu na re.

Anhte ru yak jam jau hkrum nna  koi yen ai shara hta she hka kaba, marang htu jam jau grau nna kahtap jaw ai, Karai Kasang gaw n tara nga nna hkam sha na re, Karai Kasang hpe mara shagun na zawn gaw nga na re. Daini anhte myit n pyaw nna yawn hkyen nga na malai Karai Kasang hpe chyeju dum ga.

Wa e mahkrum madup ndai lu ai chyeju dum ai. Ya kaw nna gaw ndai zawn re hka ntsa hta wutdek nta htap shi daram re gap lu na chyeju bai jaw rit.

Mungdan hpe ngwi pyaw na chyeju jaw rit. Ya yak hkak ai ndai gaw nang madu hte Wudang hpai ai rai u ga.

Ngai hpe Wudang ndai hpe hpai jin nna, Wudang ndai hpe, yak hkak ai ndai hpe shaman chyeju shatai kau ya rit.

Karai Kasang a shaman chyeju gaw mau hpa re, yak magang grau nna tsaw wa magang re.

Karai Kasang a shaman chyeju n lawm ai rai yang, yak yang hkrat sum mat wa ai. Yak yang myit htum mat wa ai. Karai Kasang a shaman chyeju gaw yak magang grau nna awng dang magang re.

Tsawra ai nu wa hpu nau ni e myit n htum ga, ndai yak hkak ai ten, ndai hpyen hprawng hprawng hkawm ai ten nanhte hkum ding dek a makau kaw Madu Yesu hkan nang taw ai.

Daini anhte hpyen yen hpyen hprawng hprawng taw nga ai.  Lai mat wa sai 2000 jan ning hta mung Madu Yesu shi shangai ai hte nan hpyen hprawng hprawng ra ai. Daini anhte hpyen hprawng ai ten hta mung Madu Yesu shi nan anhte a lapran kaw nga ai. Anhte hte rau shi hpyen hprawng lawm taw nga ai. Anhte mung yak hkak ai ten hta myit n htum ai sha anhte a mungdan ngwi pyaw wa u ga, mungdan ningbaw ni mung mungdan hpe tara rapra simsa ai de woi sa wa lu u ga, majan a majaw ru yak jam jau hkrum nga ai ni hpe mung Karai Kasang shalan shabran ya u ga grau akyu hpyi nna Madu Yesu anhte rau nga ai hpe myit dum ga. Yak hkak ai gaw Madu Yesu anhte a lapran e shi nga ai ngu ai hpe madun ai re.

Lawa jau ginwang na hpyen yen masha ni gaw lai wa sai 22 March 2025 ya shani Lawa mare hte Lawa jau ginwang hta  n myit mada ai sha, majan kaba byin mat wa ai majaw dumbri dumbra rai nna Lawa Mare hte ni htep ai Namti, Mogaung, Myitkyina de hpyen koi yen hkawm mat ai rai nga ai.

Lawa jau ginwang na hpyen koi yen taw ai masha ni St. Theresa hpyen yen dabang, Namti Jumdwi Jak wang, hpyen yen dabang  kaw htinggaw ( 300 ) jan hte PLN, St. Joseph hpyen yen dabang kaw htinggaw ( 100 ) jan nga ai lam chye lu ga ai.