Shinggyin masha ni gaw myit kraw kata nga yang, Salum nga na sha chye madat nga ai. Hkam sha lam a daju, hku hkau lam ni mahkra a manu shadan ai lam ni hte yu ga nga yang e, myit masin salum kraw kata kaw na nga tsun lang chye nga ga ai. Daini Madu Yesu tsun ai myit kraw kata n lawm ai, ntsa lam sha jahpai nna galaw chye ai lai kyang ni hte, hpyi hpun ai ningbaw ningla ni a, n jaw n ang ai jashut ladat hte sharin shaga hkan sa taw nga ai lam hpe ja ja madi madun dan sai ria nga ai.

Ndai  Hparishe ni a galaw sa ai lam ni gaw, shanhte hkum nan mung Karai Kasang kaw n du lu ai sha n ga, kaga masha ni hpe mung lam shadam ya taw nga ai. Shinggan kaw a myu mi, bai shidu de rai yang gaw a myu mi rai, n hkru n kaja ai chyahkyawn myit masin re ai salum a malai, Karai Kasang hpe tsawra nna, kaga masha ni hpe mung tsawra chye ai salum madu ni tai ra ga ai. Bai Karai Kasang hpe tam nna, shi a yaw shada ai hte maren hkan sa chye lu na matu n gun dat nga ga. Tinang a makam masham hpe gara hku hkan sa shatup nga ai kun ngu ai hpe mung bai myit dinglik yu ga.