(21st Ordinary Sunday of year C),2025
PRAN WAN LADAW LABAN (21), C SHANING
(21st Ordinary Sunday of year C)
Dinghpring ai arawn alai chyinghka gaw li nna hpaw na matu yak nga ai nga nna Miwa ga malai nga ai.
John Bunyan gaw Hkristan a lam hpe shi a mying kaba ai laika “Pilgrim’s Progress” hta ka da ai. Hkristan wa gaw shi a myit masin hta grai myit ru myit tsang nga ai majaw, “Ngai hkye hkrang la hkrum na matu hpa galaw na rai ta?” Shi gaw ndai maga de, awra maga de yu nna, gat hkawm ai zawn rai tim, gara maga de sa na n chye ai majaw, shi hkring tsap nga ai.
Dai shaloi Evangelist ngu ai masha langai mi shi shawng de sa nna, “Nang hpa majaw hkrap nga ai kun?”Hkristan wa gaw, “Nye a lata hta lang ai Chyum Laika hpe yu yang, ngai hpe si ari jaw na matu, tara jeyang ai de du ra na hpe ngai chye na ai,” nga nna tsun ai. Dai hta n-ga, shawng na lam hpe galaw na matu nra sharawng ai, lahkawng ngu na lam hpe mung n lu galaw ai majaw myit tsang nga ai. Ndai nye a shingdu e nga ai ndai lit gaw ngai hpe lup sung hku hta grau nem shangun na re, dai majaw ngarai de hkrat hkrum na hpe hkrit nga nngai.
Dai hta n-ga, Sara e, ngai htawng de shang na matu n ging dan ai rai yang, tara jeyang hkrum na matu n ging dan ai, dai hku nna ngai hpe ari jaw hkrum na re. Ndai lam ni hpe myit lu shagu, ngai hkrap nga ai.” Ngu nna tsun lai wa ai.
Dai shaloi **Kabu Gara Shiga hkaw tsun ai wa** gaw, “Ndai gaw na a masa rai yang, htawm e du wa na pawt sindawng ai kaw na hprawng mat wa u,” ngu nna tsun nhtawm , lata layung madi madun dan let, “Dai (chyinghka kaji) hpe mu ai kun?” Ngu nna San lai wa ai.
Hkristan** wa gaw, “Ngai n mu ai,” ngu nna htan wu ai. Kabu Gara Shiga hkaw tsun ai wa** gaw, “Rai yang, awra maga de nga ai**Shining Light** hpe mu ai kun?” Ngu nna bai san ai ten Shi gaw, “Ngai mu ai shadu ai,” ngu nna htan lai wa ai.
Dai shaloi Kabu Gara Shiga hkaw tsun ai wa gaw, “Dai nhtoi hpe na a myi hta galoi mung tawn da u, dai nhtoi de dingyang sa wa u. Nang dai hku galaw yang, chyinghka hpe mu lu na re. Dai chyinghka hpe nang akawk dat ai shaloi, dai chyinghka gaw nang hpe hpa galaw ra na hpe tsun dan na re,” nga nna tsun lai wa ai.
Anhte a prat gaw hkrun lam hkawm ai re. Bai nna, kalang lang anhte mung Hkristan wa zawn, gara lam hku hkawm na hpe n chye ai sha, lam nmaw kaw tsap nga chye ga ai. Lam lahkawng nga ai — lam kaba hte lam kaji. Dam lada ai lam gaw hten byak ai de, gyip ai lam gaw htani htana asak de woi wa ai. Ndai bat na Kabu Gara Shiga hta, Yesu Hkristu gaw gyip ai lam hpe lata la na matu shadut nga ai. Ndai lam lahkawng hpe atsawm myit yu nna Yesu Hkristu hte htani htana asak de woi sa wa ai lam kaji hpe lata la lu na matu akyu hpyi nga ga.
Chyum mungga daw langai Esaia laika hta
Kabu gara shiga gaw amyu baw shagu de du wa na re. Karai Kasang gaw shi a magam bungli a matu sadi dung ai wenyi lam yan a ningbaw ningla ni hpe lata la na re hpe tsun da nga ai.
Chyum mungga daw hpe anhte lam masum hku nna mai yu ai.
- Karai Kasang gaw tara jeyang ai lam hte hkye hkrang la ai lam a matu amyu bawsang yawng hpe hpaw ninghtan na re. – “Nye a hpung shingkang” ngu hkang da ai hte, masha ni gaw mungkan ting de kabu gara shiga hpe hkaw tsun shachyan shabra na ra ai lam tsun da ai.
- Dinghpring ai ni hpe Yerusalem mare de bai woi wa ai marang e Karai Kasang a mungdan gaw hkum tsup wa na re hpe tsun da nga ai.
- Shanhte hpe amyu baw shagu kaw na hkinjawng aya dang na matu lata san da ai lam gaw, wenyi lam hta ningbaw ningla ni tai wa na hpe tsun mayu ai rai nga ai.
Dai majaw Kabu Gara Shiga Magam Bungli ngu ai hta Karai Kasang a hkye hkrang la ai lam hpe garan kachyan na lit la ai. Ngut nna e Karai Kasang gaw myit masin san seng ai ni hpe shi a magam bungli a matu lata la na lam tsun da ai.. Amyu n ginhka ai sha, Karai Kasang a mungdan hpe rau jawm hkam la mai nga ai. Myit hkrum kahkyin gumdin lam hpe shadum ya ai.
Chyum mungga daw lahkawng hku na anhte shadum ya ai lam gaw Karai Kasang anhte hpe tsawra ai majaw sharin shaga ai lam tsun da nga ai. Shinggyim masha ni kashu kasha ni hpe sharin shaga ai zawn, Karai Kasang mung shi a kashu kasha ni hpe sharin shaga nga ai. *”Madu gaw shi tsaw ra ai wa hpe sharin shaga nga ai”** (V. 6). Dai majaw, anhte a yak hkak ai lam ni hpe Karai Kasang a matsun hku nna mu mada ra ai.
2.Sharin achyin ai lam gaw aten kadun mi hta hkra machyi ai zawn nga tim, htawm hpang de **”dinghpring ai asi si wa shangun ai”** (V. 11). Ga shadawn, hkum hkrang shamu shamawt ai lam galaw ai shaloi anhte a shan ni machyi tim, ngut ai hpang n-gun ja wa ai zawn, Karai Kasang a hkang da ai lam ni gaw anhte hpe wenyi lam hta mung shangang shakang ya ai.
3.Karai Kasang tsun ai gaw, “Gawng kya ai lata ni hpe sharawt nna, gawng kya ai lahput ni hpe shangang shakang ya u” (V. 12). Tsun mayu ai gaw, myit n daw ai sha, Karai Kasang a garum shingtau ai lam hpe kam hpa manoi manat nna, shakut sharang ra ai lam rai nga ai.
Dai hta n-ga, **”Nanhte a lagaw lahkam ni hpe shading mu”** (V. 13) nga ai hte maren, Karai Kasang a lam hta ngang ngang kang kang hkawm sa na matu shadum ya ai rai nga ai.
Karai Kasang a sharin shaga ai lam hpe nyet kau na matu nre , dai hpe tsawra myit a daw langai hku hkap la ra ai. Yak hkak ai lam shagu gaw anhte hpe grau kung hpan wa hkra Karai Kasang lajang da ya ai lam rai nga ai. Dai majaw, gawng kya ai ten hta Karai Kasang hpe kamhpa nna matut hkawm sa na ra ga ai.
Ndai bat na lk a kabu gara shiga hta
Dai rai nna Yesu gaw mare kahtawng shagu hta hkaw tsun sharin shaga let, Yerusalem mare de sa wa ai. Marai langai ngai nang hpe, “Madu e, hkyehkrang la ai hkrum na ni n law ma ai kun?” Shi gaw, “Gyip ai chyinghka hku shang na shakut shaja mu,” ngu nna shanhte hpe tsun na ra ai. Kaning rai nme law, ngai nanhte hpe tsun ma de ai gaw, masha law law wa shang mayu ti mung, n shang lu na ma ai,” ngu mu ai. (Luka 13:22-24) hpe tsun dan ai. Ndai gaw Karai Kasang a mungdan de du lu na matu **tinang a lit** hte **teng man ai shakut shaja ai lam** ra nga ai hpe shadum ya nga ai.
2.”Gyip ai Chyinghka” a lachyum hpe yu yu ga
Shang na matu loi ai chyinghka n re hpe tsun shadum ya nga ai.** Makam masham gaw mying sha Hkristan langai hku hkap la ai (sh) htunghking hpe hkan sa ai hta grau nga ai.Masha law malawng gaw, “Anhte nang hpe chye nga ai (Luka 13:26)” nga nna tsun nga ai ten, Yesu gaw “**nanhte a lai kyang hte myit masin**” (Mahte 7:21-23) hpe yu nga ai lam tsun da nga ai. Shakut shaja lam ra ai hpe shadum ya ai.
(3) Hkrit tsang hpa lam ni:** – aten garawt ai “Madu chyinghka la kau nu ai” (Luka 13:25) ngu nna tsun da nga ai. Karai Kasang jaw ya ai chyeju shadawn shadang nga ai. “Shanhte gaw na a lusha sha nna, na a sharin shaga ai ga madat nga ma ai” (13:26), rai tim Yesu gaw, “ngai nanhte hpe n chye nngai” (13:27) ngu bai htan wu ai. **Myit masin madat mara ai gaw shinggan arawn alai hta grau ahkyak nga ai.**nga nna shadum da nga ai.
(4) **Myit mada ai Kabu Gara Shiga:** – “Sinpraw sinna dingda de na sa wa marit” (13:29). Karai Kasang a saw shaga ai lam gaw, hpang jahtum na hte shawng na amyu bawsang yawng a matu rai nga ai. “Hpang jahtum na ni gaw shawng na mara ai” (13:30). Karai Kasang a chyeju gaw shinggyim htung lailen hpe tawt lai ngawai. Nga nna mung tsun da nga ai.
Tatut jai lang na matu sharin ya nga ai 1. Tengman ai makam masham hpe jep yu ga: Anhte a makam masham gaw **Karai Kasang hte shani shagu matut mahkai nga ai kun? mara hpe koi yen ai lam, masha kaga ni hpe tsaw ra ai lam** ni hta dan dawng nga ai kun? Ngu nna sawn yu ra ai.
2. Daini jang galaw ra lam rai nga ai.”Aten naw nga yang chyeju hkam la mu” (2 Kor 6:2). Hpawt ni na matu hkum tsang myit nga nna tsun da ai.
3. Karai Kasang a mungdan gaw masha shagu a matu rai nga ai.. Tinang a tinggyeng myit hpe kau da nna Karai Kasang a shaga la ai lam hpe madat mara nga ga.
“Gyip ai chyinghka” gaw hkrit tsang lam n rai, lachyum rawng ai prat de saw shaga ai lam mahtang rai nga ai. Yesu shi nan dai chyinghka rai nga ai (Yawhan 10:9)nga nna tsun da ai. Shi hpe kam sham nna, myit masin mahkra hte madat mara ai wa kadai mung, htani htana daw sha poi hta shara lu la na rai nga ai.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta. ..Hkunlangai … ngu na lanban rai nga ai hti ang ai ja chyum mungga ni gaw chyum mungga daw langai ..Langai ngu na..Esa laika 66: 18-21 .chyum mungga daw lahkawng hebre hpung masha ni hpang de san paulu shagun dat ai laika 12: 5-7, 11-13 kabu gara shiga Lk 13: 22-30
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.
CHYUM MUNGGA DAW NI:-
Esaia 66:18-21 …. Masha amyu ni hte, ga amyu baw kaga tsun ai ni mahkra hpe shinggyin na matu, ngai sa du na nngai. Shanhte mung sa du nna, nye a arawng sadang hpe mu lu na mara ai.
Hebre 12:5-7. 11-13 …… Madu shi tsawra ai wa hpe sharin nga i.
Luka 13:22-30 ….. Sinpraw sinna, dingdung dingda maga de na masha ni sa nna, Karai Kasang a mungdan hta ningngai nga na mara ai.