Daini na Ja Chyum Mungga hpe hti sum ru yu ai shaloi e, tengman lam a majaw Yawhan Baptista Sat kau hkrum ai lam hpe na lu ga ai. Herod gaw Yawhan hpa Karai Kasang a kaba dik ai Prophet hte Kasa re ngu hkrit hkungga nga ai. Raitim mung Yawhan gaw Herod hkawhkam a sadi n dung ai kanawn mazum lam a majaw, shi hpe mara tam shagun na n hkrit nga ai. Herod hkawhkam gaw shi a nta masha ni hte shi a manaw manang ni a ra sharawng ai lam hpe byin mayu ai majaw, Yawhan hpe Baw htau sat kau sai rai nga ai. Yawhan Baptista bai hkrung rawt sai nga ai nbung shiga masha ni tsun ai hpe na ai shaloi, shi a myit gaw hkrit kajawng nga ai.

Herod hkawhkam gaw Madu Yesu a lam na ai shaloi, shi baw htau sat kau sai Yawhan gaw si ai kaw na bai hkrung rawt sai ngu kam kau nu ai. Raitim Herod hkawhkam a matu gaw gam n kaja ai hte tengman ai lam hta ngang ngang tsap ai wa hte man hkrum, hkrum na hpe koi kau ai lam gaw shi hkum shi mara kaw na nlu ningdang ai majaw rai nga ai. Shi gaw jaw ai, shut ai hpe chye nga ninglen shut ai maga de ngang ngang tsap mat ai rai nga ai. Dai gaw shi a gawng kya ai lam a kumla nan rai nga ai. Karai Kasang a chyeju gaw anhte hpe ruyak lam ni hte hkrum katut wa yang, gawng kya ai lam ni hpe tawt lai lu ai re. Dai zawn re ai chyeju hkam la lu na matu gaw shi Madu kaw tut nawng kam hpa ra ga ai.