Wa Jau Thomas Salaw Brang Awng jau tai wa na shaga la hkrum ai lam hpe tsun shapraw dan ai hta:
Wa jau gaw kaji ten Kachyihtu, bumga de nga ai hte maren jau ngu ai gaw n mu yu ai, RVA Radio nsen shapoi ai kaw na sha, wa jau a nsen hpe na yu ai. Tsang ( 8 ) san poi awng da ai aten hta dai shaloi na ginwang up jau rai nga ai Wa Jau Peter Lazum Naw Bawk kaw nna Kachyihtu de shaga la nna, Myo mare kaba de jawng lung shangun ai, tsang ( 10 ) du ai shaloi jau tai jawng sa shangun mayu ai nga nna jau tai jawng kaji de sa shangun dat ai. Bumga na re hte maren myo ga de jawng lung ai shaloi gaw masha ni kalang mi hti yang chye na ai laika hpe wa jau gaw lahkawng masum lang hti ra ai, ja gumhpraw lam hta mung yak hkak ai lam law law nga ai, kanu kawa ni gaw bumga de yi sha galaw sha ai re majaw ja gumhpraw tup hkrak n lu garum ya ai. Raitimung Karai Kasang a chyeju hte dai yak hkak ai lam ni hpe tawt lai lu sai.
Yangon jau tai dakkasu jawng kaba de du ai shaloi mung, Second year shaning san poi hkrat ai majaw grai myit n pyaw ai, grai myit daw mat ai, ngai na shaga la ai lam n rai sai kun, ngai wa sana kun ngu nna grai myit kau ai. Raitimung akyu hpyi shakut ai, manaw manang ni hte wa jau ni mung myit n daw ai sha shakut na matu n’gun jaw ai majaw bai htai awng dang la lu ai. Dai zawn re ai yak hkak ai lam ni law law nga ai raitim Karai Kasang garum ya ai chyeju hte manaw manang ni garum ya ai chyeju, makyin jinghku ni a akyu hpyi garum ya ai nsen hte yak hkak ai lam ni hpe tawt lai la lu ai.
Wa jau a kawa a hkam sha lam tsun ai hta:
An a kasha jau tai wa ai gaw anhte nawku hpung masha ni yawng wa jau, mama, brother, tara hkaw sara ni law law tai wa u ga ngu nna akyu hpyi ai majaw akyu hpyi ga dik wa ai re ngu nna hkam sha lu ai, grai kabu ai.
An a kasha hpe wa jau kaw nnan ap ai aten hta bumga de gaw sara kaba ni grai taw ai majaw hpung sara kaba tai u ga ngu nna ap dat ai re. Ginwang up jau kaw nna na kasha ngai hpe jaw kau rit ngu hpyi wa ai, dai shaloi wa jau e nawng gaw n mai na re, kanau ni mung grai naw kaji ai hkrai re majaw an kanu yan kawa mung yak ai ngu wa jau hpe tsun dat ai. Dai shaloi wa jau gaw dai rai yang ga-ang hkup di ga le nga ai majaw mai ai le ngu tsun dat ai re. Dai zawn wa jau rau shaga hpang ai kaw nna wa jau atsam jaw shakut la ai majaw an a kasha ya na zawn jau tai wa ai majaw akyu hpyi garum ai ni yawng hpe n dang tsun hkra chyeju dum mayu ai.
Kawa a Kabu myi prwi pru ai lam:
Shi a jau tai wa na hkrun lam hta jam jau ai lam ni hpe myit dat yang hkrap mayu wa ai, myi prwi si pru wa ai mung n dum ai, shi hkrai hkrai kahte wa yang she dum ai. Kabu myi prwi rai nga ai.
Kanu a hkam sha lam tsun shapraw ai hta:
Matsan mayan yan kaba wa ai, ndai zawn Karai Kasang a magam hpe gun hpai lu ai majaw grai chyeju kaba ai.
