Shinggyim masha n mai byin ai ngu ai lam ni, masha ni yu kaji ai ni hpe e Madu Karai Kasang gaw, shi a hkye hkrang la ai magam hta jai lang nga ai hpe mu chye lu nga ga ai. Shingrai grai asak gawng kung kaba wa ai ten du hkra kashu kasha n lu ai Abraham hpe na a amyu aroi hpe lamu ntsa na shagan ni zawn law htam shangun na nga (Npawt nhpang 15:5) hta tsun da sai re.

(LK 1:16) hta e mung mahkawn hkawn jet kaw na ma la kasha shangai na lam tsun dan nga ai. Shi hte lu ai n re ai ma hpe yu bau maka na matu Joseph hpe lit magam jaw nu ai. Shingrai dai ni na kabu gara shiga hta mung, grai kung kyang ai Nga hkwi jau bu wa hpe mung tara hkaw ai lak sama wa gaw, n’htoi grai san jang she sumgawn jahkrat shangun dat nu ai. Ndai mabyin ni mahkra hta e, bung ai lam gaw, shawng nnan e dai zawn mabyin ni hta n kam ai, n lu hkap la ai lam ni byin nga tim, hpang jahtum e gaw, dai masha wa kaw kam sham ai hte shang lawm lu ai majaw lak lai ai chyeju atsam ni lu la hkam sha ai hpe na lu ga ai majaw, anhte mung kasi la let shakut sa ga law.