Anhte shinggyim masha ni kaga masha ni kaw na chyeju hkam la lu ga ai zawn, kaga masha ni hpe mung chyeju garum jaw ya ga na sai. Chyeju jaw ya ga ai mi rai rai, bai lu la ga ai mi rai rai, tawnda grin ai myit masa hpe e daini na chyum mungga hta, mu lu nga ga ai. Madu Karai Kasang gaw masha ni hpe chyeju jaw ya ai wa re. Dai zawn chyeju jaw lu na matu akyu hpyi ai, Kawa Karai Kasang hte matut mahkai nna wenyi n gun la ra ai.

Madu Karai gaw masha ni bai chyeju htang na hpe mung myit marin ai wa n re. Karai Kasang kaw na chyeju hkam la ai Simon a kani gaw, shi mai tsai mat ai hte langta rawt nna, Madu Yesu hpe daw jau let chyeju htang nga ai. Bai kaga machyi masha ni hpe mung Karai Kasang hpang de woi sa chye nga ai. Raitim mung kalang lang e gaw tinang a shawang tsawra myit wa kaga wa a matu dingbai dingna byin chye ai majaw, tinang gaw, aten shara makau grupyin hpe mung masam maram yu chye ra nga ai. Shingrai hpa lam hpe raitim shawng kaw na tau nau hkyen lajang let galaw sa ai rai yang, akyu rawng ai magam bungli hpe awng dang lu la ai hpe n’gun jaw ya ai rai nga ai.