Angelus akyu hpyi ai lam hpe n woi awn shi yang Wa sarabyin gaw, Nawku hpung gaw Yesu a kasi hpe hkan sa ai hta galoi mung “shagrit shanem ai jawng” tai lu na matu, shing nrai, “yawng hpe hkap tau hkalum la ai nta” tai lu na matu, shingjawng hkat ai lam ni hpe tawn kau da lu na matu akyu hpyi ya ai.
San Petru htingnu shawng hta, Laban shana maga hta Angelus akyu hpyi na matu zuphpawng nga ai nawku bu hkawm sa ai ni hpe tsun shaga ai shaloi, Wa Sarabyin Leo gaw, shagrit shanem ai, kaga masha ni hpe hpaw tsun dan ai lam ahkyak ai lam hpe tsun dan ai. Daini na Kabu Gara Shiga hpe myit sumru ai lam hta Luka a Kabu Gara Shiga hta, Yesu hpe Hparishe langai mi gaw lusha sha na matu saw shaga ai, htunghking shagu hta rau sha sha ku kaw dung ai gaw simsa lam, kanawn mazum lam, garan gachyan ai lam a kumla rai ai hpe kasi la mai ai lam hpe tsun dan ai.
Tengman ai hku hkau lam a matu shakut ai
Tengman ai hku hkau lam gaw galoi mung n loi ai hpe myit dum let, Wa Sarabyin Leo gaw, makam masham ningbaw wa a nta de sa du ai shaloi, Yesu hpe grai hku hkau ai hku “mu mada” ai lam hpe sang lang dan ai, rai tim, Yesu gaw shagrit shanem let, manam kaja langai zawn, hkungga lara ai hte myit masin tup hte, sharin achyin ai aten hpe mung jaw ya ai lam hpe sang lang dan ai. Madu gaw shanhte hpe dai aten hte seng ai ga shadawn langai mi hpe garan gachyan ya ai, dai gaw masha ni hte bung ai myit masa hpe tsun dan ai, shanhte a ahkyak ai lam hpe madun na matu “mu mada hkrum” na matu re, dai hku nna hpunau nauna myit hte garan gachyan ai lam hta shagrit shanem let rau nga ai hta grau nna shingjawng hkat ai myit hpe shabyin ya ai lam hpe madun dan ai.
Madu Yesu a ga madat ai
Wa Sarabyin gaw, kam sham ai ni hpe, Misa hkung ga hta zuphpawng ai shaloi, Madu anhte hpe sharin ya na lam ni hpe madat mara na matu n-gun jaw da nga ai. Lam mi hku tsun ga nga yang, Madu gaw “anhte a manam tai wa nna, shi anhte hpe gara hku mu mada ai lam tsun dan lu ai.” Wa Sarabyin tsun ai hta, anhte hkum anhte Madu a myi hte mu lu hkra shakut na hte, shada da shingjawng hkat ai, masat masa galaw ai, shing nrai, kaga masha ni hte shingdaw ai lam ni hpe sha myit maju n jung lu na gaw ahkyak ai.
Teng man ai lawt lu lam hpe jaw ya ai shagrit shanem ai myit
Yesu gaw, shagrit shanem ai myit gaw tengman ai lawt lu lam hpe gara hku ahkang jaw ai lam hpe sang lang dan ai, nga nna Wa Sarabyin matut tsun sang lang dan ai, hpa majaw nga yang, “Karai Kasang a Mungdan hte shi a dinghpring ai lam gaw anhte a tengman ai lam tai wa ai” ngu ai majaw, “shagrit shanem ai gaw anhte hkum nan kaw na teng sha lawt lu ai lam rai nga ai” ngu ai hpe tsun dan ai. Anhte hkum anhte sha shagrau ai (sh) myit maju jung ai shaloi, Karai Kasang a man hta shi a kashu kasha ni hku nna anhte kade daram manu dan ai hpe mung, ndai tengman ai lam kaw na pru wa ai “sublime dignity” hpe mung n dum mat ga ai.
“Shawng na shara hpe lu na matu shakut na malai, hpang jahtum na shara ni hpe la na matu sharin la ai shaloi, dai sari sadang dan dawng wa nna, anhte gaw asan sha, n shakut ra ai sha, shawng de du wa na re.”