Daini gaw,
Karai Kasang Shanu Nga ai Hpe Tatut Hkam Sha ai
ngu ai Ga-baw hpe jawm sumru let akyu hpyi ga.
Karai Kasang, anhte hte rau kaja wa shanu nga ai ngu ai lam gaw, Shi hte hkrum kanawn na, shi hpe chye-na na lam ni a ahkyak ai npawt nhpang rai nga ai.
Bai, Karai Kasang gaw Madu Yesu galaw shatup lai wa sai lam ni ma-hkra hku nna Shi a Hkum hpe shadan dan nga ai. Chyum Mungga daw ni hpe jawm htii nna hka ja la ga.
Shakawn Kungdawn Laika Daw kaba hkun-sanit, daw kaji mali (27:4) hpe hti yu ga:
“Lam langai mi ngai Karai Kasang hpe hpyi se ai;
Ngai ahkrung nga ai nhtoi hte ting,
Karai Kasang a nta hta nga nga lu nna,
Karai Kasang a tsawm pra ai mu lu na hte,
Shi a Htingnu e myit htang nga na, ngai ra nga nngai.”
Karai Kasang hte hkrum ai ngu ai gaw mung-sung ga-sung zawn zawn she nga na re. Mau hpa rai nna, magra zum n lu, masha nkau mi sha kalang lang lu mai ai baw rai nna, ta-tut jum tek madun na matu myit mada shara n nga ai baw zawn rai nga ai.
Anhte mung, Karai Kasang shanu nga ai lam hpe, anhte myit-kraw hta hkam sha ai lam ni, mahkawn mangwi ni hte gayau kau chye ga ai. Nbung bung-shi ahpawt hkra ai zawn aten ladaw kadun mi laman byin ai zawn shadu chye ga ai.
Kaja wa nga yawng, Karai Kasang shanu nga ai lam gaw tinang a manang wa, shing nrai, tinang a nrum ntau wa/jan tinang hte rau nga nga ai zawn sha nga nga ai. Karai Kasng gaw anhte kaw na galoi mung n yen mat wa ai, anhte hpe n kau da ai.
Anhte Hkristan ni hta malawng maga byin chye a gaw: gawk langai mi hta sha tinang a manang wa hte nga taw tim, shi nga taw ai hpe n dum n chye kau, malap da ai zawn, Karai Kasang anhte hte shara mi kaw sha nga nga tim shi a ni-htep ai hpe n mu, n dum kau chye, malap kau nga ai.
Bai, ga-shadawn langai mi: nang na manang wa hte sha-ku langai mi hta sha, ndai maga, wora maga jawm dung nga tim, nang gaw na a computer, shing nrai, lama ma hta myit jung nga mat nna na manang wa nga taw ai hpe pyi malap kau chye ai hpa rai nga ai.
Dai hte maren, anhte mung ndai mungkan prat a lam ni hta chyu sha, myit jung nga nna, n rau nhtau rai nga let, tinang a nsa hta pyi grau ni htep nga ai Karai Kasang hpe malap da chye nga ga ai.
Raitim, ya sha anhte na la sai Shakawn Kungdawn Ga hta myit mada shara mu lu saga ai. Kalang mi bai madat yu ga:
“Lam langai mi ngai Karai Kasang hpe hpyi se ai;
Ngai ahkrung nga ai nhtoi hte ting,
Karai Kasang a nta hta nga nga lu nna,
Karai Kasang a tsawm pra ai mu lu na hte,
Shi a Htingnu e myit htang nga na, ngai ra nga nngai.”
Ndai zawn Karai Kasang shanu nga ai lam hpe hkan tam shachyut ai ni gaw lata gaman bai nhtang wa na n rai.
Karai Kasang hpe tam ai ngu ai gaw Shi hte hkrum na matu rai nga ai. Tinang a myit hta hkam sha ai lam ni, gayau gara rai myit shuk na zawn re lam ma hkra hpe kabai kau u.
Hpa majaw nga yang, Karai Kasang gaw nang hte rau rai nga sai. Nang hkam sha, nang shadu ai hta Karai Kasang gaw nang hte ni htep nga ai. Kaga mungkan lam ni nang hte ni htep ai hta grau nna Shi nang hte rau rai nga ai.
Shi a Wenyi, dinghta ga hte Shi ni htep ai lam gaw, nang kaw na n pru mat wa ai, nang hpe galoi mung n kau da ai. Sha-ku hta rau dung nga ai na manang wa hte myi-man chyaw yu mada let, nang shaga chyai ai zawn sha, Karai Kasang hte mung hkrum shaga lu nga ai.
Bai, Shakawn Kungdawn Laika, Daw kaba latsa e sumshi-jahku, daw kaji sanit (139:7) hta:
“Na Wenyi hte ngai kanang e hka lu na n hka?
Na a myiman kaw nna gade hprawng lu na ma? nga nna mung tsun da nga ai.
Shi gaw, nang kaw na hprawng makoi mat ai manang n rai nga ai.
Kam ai aten, kam ai shara de bung poi mat wa ai nbung bung-shi mung n rai nga ai.
Shi hpe tam nga ai ni hpe Shi -hkum -shi asan sha, madun dan lu hkra, magap nga ai sumpan grang hpe ashep je kau na, si hkam na Karai Kasang rai nga ai.
Hpan da ai Amu mahkra a janmau rai nga ai anhte hpe shi hpang de bai lakawn woi la na matu, n sim n sa shakut nga Karai kasang Shi rai nga ai. Edin Sun hta Adam, Eva yan hte rau kawa hte kasha yan zawn rai, hkawm ai zawn anhte hte mung, bai hkrat sum ai lam n nga hkra, rau bai hkawm lu na matu shakut nga ai. Dai shaloi gaw, Shi hte anhte a lapran, madin – shakum ngu ai n nga na sai.
Akyu Hpi Ga
Karai Kasang a shanu nga ai lam nga nga ai hpe myit dum ga.
- Shakawn Kungdawn, Daw kaba latsa e sumshi-jahku, daw kaji sanit (139:7) hta na,
“Na Wenyi hte ngai kanang e hka lu na n hka?
Na a myiman kaw nna gade hprawng lu na ma? ngu ai hpe myit dum ga.
Myihtoi Yeremia, daw kaba hkun-jahku, daw kaji shi-masum (29:13) hta mung, “Myit masin mahkra hte ngai hpe hkan tam yang, nanhte ngai hpe mu na myit dai” ngu ai ga hpe mung myit dum sumru yu ga.
- Karai Kasang hkan tam ai hta nang hkrit tsang ai lam hpa baw nga ai kun?
Yawhan a shagun laika Langai, daw kaba mali, daw kaji shi-matsat (1 Yawhan 4:18) hta:
“Tsawra ai myit hta e hkrit kang ai myit n rawng lu ai; kup chyip re ai tsawra myit gaw, hkrit kang ai myit hpe shaden kau wu ai” nga nna mung tsun da nga ai.
- Shakawn Kungdan daw kaba hkun-sanit, daw kaji mali (27:4) hta anhte na lai wa sai ga hpe bai dum ga:
““Lam langai mi ngai Karai Kasang hpe hpyi se ai;
Ngai ahkrung nga ai nhtoi hte ting,
Karai Kasang a nta hta nga nga lu nna,
Karai Kasang a tsawm pra ai mu lu na hte,
Shi a Htingnu e myit htang nga na, ngai ra nga nngai.”
Nang hta un-ang ai lam nga yang, shi hta ap ya u. Shi nang hte rau nga nga sai hpe kam sham myit the hkap hkam la u. Shi hte ga shaga u. Shi myit ra ai hku nang hpe ga shaga na matu mung ahkang jaw u.
Madu Karai Kasang gaw nanhte yawng hte rau htep htep nga nga ai hpe hkap-yin la nna, shi a ngwi pyaw simsa ai htani htana asak chyeju nanhte yawng hte rau anga nga nu ga law!
