Nawku hpung shagu ni hta e, ta tut hkan galaw na matu yak hkak ai lam ni lawm taw nga ai hpe mu lu ga ai. Daini na kabu gara shiga hta e Madu Yesu shi a hpang hkan nang mayu ai ni hkan sa ra ai ahkyak ai gin lam mali hpe tsun sharin shadum ya nga ai. Dai hta e hkan sa ra ai lam lahkawng gaw, Hpyen wa hpe tsawra ra na hte Ja tara rai nga ai. Bai koi yen ra ai lam lahkawng gaw, hpyen wa hpe ninghkap ai hte kaga masha ni hpe jeyang dawdan ai lam ni hpe koi yen ra ai lam nan rai nga ai. Ndai hkan sa lam ni gaw n mai byin ai lam gaw n rai nga ai. Yak hkak ai mung rai nga ai. Madu Yesu hkan nan hkan sa ai zawn, San pra ai ni nan mung n mai byin ai lam sakse hkam da sai re. Shiga madat nu wa ni e, ndai mungkan ntsa hta e yak yak hkak hkak hte lu la ai arai ni mahkra gaw, grau nna manu dan la nga ai lam yawng chye chyalu rai nga ga ai. Dai majaw anhte yawng mung Chyoi pra ai wenyi Karai Kasang kaw chyeju atsam hpyi la nna, (Rom 5:5, Galati 5: 22,23) kaw na mungga ni hte maren arau sha shakut hkan sa nga ga law.