HTAI YA AI WA- WA JAU DR. JOSEPH GAWLU YUNG WA

GA SAN – Ngai lai sai 2009 Ning December hta, Sara Yawhan gaw ngai hpe shata hti laika dut shangun ai. Lu dut ai gumhpraw Yun 20 hpe bumhkum npu e bang da ai wa, shamat kau ai. Magam dap kaw rai nna gumhpraw n lu ai majaw n lu wa kau ai; dai hpang magam dap ka nna pru hkring sa mat nna hka dai hpe n lu wa kau ai. Mara lu na kun?

HTAI – Tinang jai sha kau ai mung n rai, magam gun re majaw gumhpraw mung n lu re majaw n lu jaw ai re majaw mara ngu nna n sawn la ga. Sara yawhan naw nga yang gaw, dai Y20 hpe naw wa ra na kun ngu nna san yu u.

GA SAN – Kahtawlik Nawku Hpung masha ni si ai shaloi, mang makoi kyu hpyi ai hta Yerusalem mahkawn hpe hkawn ai gaw hpa lachyum re kun? Yerusalem Mungdan na hpung masha ni gaw gara hku mahkawn ai kun?

HTAI – Israel mungdan na Yerusalem mare gaw dinghta ga na Karai Kasang a Amyu Israela masha ni grai tsaw ra manu shadan ai mare kaba rai nga ai. Ya, Madu Yesu hpe kam sham hkap la ai maigan amyu ni hpawng chyawm ai Nawku Hpung hpe Sumsing Mungdan a Yerusalem mare Nnan ngu nna shamying ai. Hpang jahtum nhtoi hta anhte yawng gaw Madu Yesu lajang da nga ai sumsing mungdan de shang wa na re. Dai majaw anhte kaw na langai ngai si wa ai shaloi “Htaw Chyoi Pra ai Yerusalem mare hta bai hkrum ga” ngu nna mahkawn ga ai; marit maroi le i!

SAN AI NI – Zau Bung Jau ginwang, San Columban Sara Ninghtawn, Man Chyam mare kaw shanu nga nna, ya, Miwa Gumsan Mung, Hkyu Chyin muklum kaw du nga ai Roza Dashi Roi hte Dingsing Jau Ginwang, Nbapa Lang Bung Kawng kaw shanu nga ai Slg.Thomas Jangma Shan Lum