Anhte shinggyim masha shagu gaw, myit malai lu ai ngu mabyin hte kadai wa mung n tawt lai lu nga ga ai ni chyu sha re. Hpa majaw nga yang, galaw ging ai hpe gaw n galaw nna, n galaw ging ai hpe bai galaw kau kau rai nna, aten lai jang gaw bai myit malai lu rai byin chye nga ga ai n rai a ni. Shing rai kalang lang rai yang e gaw, bai mai byen kau lu ai rai yang, bai byeng galai kau mayu ai nga nna, tsun chye nga ga ai rai nga ai.

 Daini kabu gara shiga hta, Madu Karai Kasang shi a hpung dagu madun let si mat ai shabrang ma wa gaw, Na-im ngu ai mare na gaida jan a kasha shingtai n rai nna, Ngai she rai taw yang, ngai hpa galaw na kun? ngu tinang hkum tinang bai ga san san dinglik yu ga. Shaloi e dai mabyin galai na Karai Kasang ahkaw ahkang jaw ai ngu ga nga yang, anhte ni hpa galaw na kun? Ga shadawn dai shara kaw lama na tinang rai taw nga yang, Ngai n si shi yang, ngai a majaw, nye nu myit n ngwi n pyaw ai lam n byin hkra ngai myit shatawng shada da let, shakut sa na rai nga ai. Dai majaw lahta na mabyin lam hpe hpaji la nna, teng man ai lam hta shakut hkawm sa nga ga law.