Ya daini na kabu gara shiga hta, Hparishe wa Simon hte mara kap ai Num sha yan hpe shingdaw yu ga, Shat lu sha daw jau ai ngu ai gaw, akyu lu na matu hte shada da hku hkau ai lam hpe madun dan ai lam mung re. Raitim ndai chyum laika hta, Hparishe wa Simon gaw Madu Yesu hpe ni ni htep htep yu mada nna, mara tam na matu rai nga ai hpe mu lu ga ai. Madu Karai Kasang hpe shi a ningmu hku yu mada let, shi htang da ai hku sha tsun masat na shakut nga ai.

Mara lu ai Num kasha gaw shi mara shi chye ai. Shagrit shanem ai. Shi myit malai kaba lu ai. Madu Karai hpe shi kam sham kam hpa ai wa mung re. Bai Madu Karai Kasang hpe shi a ningmu hte shi a madang hte shadawn na shi n shakut gwi ai. Bai shi hpa mung n hpyi gwi ai. Madu Karai Kasang a makau kaw ni htep ai hku nga nga ma ai yan raitim mung, n bung hkat ai myit masa a majaw, hkam la lu ai akyu chyeju gaw grai nan shai mat nga ma ai hpe anhte mu lu na la lu ga ai re. Dai majaw anhte a myit masa lai kyang ni gaw mai kaja nga na ahkyak la nga ai law.