Hkye hkrang la ai labau ting hta e shayi num sha ni gaw, ahkyak madung re ai shara kaw la taw nga ai. Ga shaka dingsa hta nga yang makam masham n bung ai, amyu rusai n bung ai ni pyi shang lawm nga ai re. Ga shadawn tsun ga nga yang, Mose hpe shangai ya ai tsi sarama lahkawng yan mung ma hpe yu matsan dum ai majaw, Hpara-u hkawhkam a kasha hpe yu bau maka shangun ma ai. Bai kaga masha ni rai nga ai Judit, Susaana, Rutha ni mung hkye la ai magam hta shakut lai wa masai.

Ga shaka ningnan hta e mung, Madu Yesu a myi man hpe hpajet hte sa katsut ya sai Veronica, Madu Karai Kasang hpe jam jau n jaw na matu, shi a madu wa hpe htet tsun ai Pilatu a madu jan ni rai nga ma ai. Ndai chyum laika hta lawm ai hpawmi shayi num ni gaw, Wudang nhpang e du hkra n hkrit n tsang rai, sadi dung let Madu Yesu a hpang e hkan nang sak se hkam ai ni rai nga ma ai. Dai majaw (MK 27: 55, Yh 19: 25) ni hta sakse ka da ai hte maren, Madu Yesu bai hkrung rawt ai lam hpe shawng ningnan mu ai mung, shayi num sha langai she rai nga ai. Kasa ni hpe garum shingtau la ai ni mung, shayi num sha ni she rai nga ai. Shingrai (Ks 1: 14 hte 1cor 9: 15) hta ka da ai hpe gumhpawm nna yu ga nga jang, Shayi num ni mung hkyela ai magam hta n nga yang nan n mai ai hpe dum sawn let shakut sa ga law.