HTAI YA AI WA – Wa Jau Dr. Joseph Gawlu Yung Wa-

GA SAN Dum nta na nawku tawn hta nampan hte shachyawm ai shaloi, nampan dibu gaw kade wa tawn ai baw re kun? Dai 1, 2, 3 nga nna tawn ai lachyum hpe naw shaleng dan rit.
HTAI Nawku jawng kaw rai tim, tinang a nta kaw rai tim, nawku tawn ni hpe nampan ni hte shatsawm ai shaloi, dibu kade, nampan kade ngu nna masat matsun da ai lam n nga ai. Htuk manu tsawm htap ai hku hkyen mai ai. Yaw shada ai lam gaw: Karai Kasang a tsawm htap ai, Sumsingmungdan tsawm htap nga ai, Edin sun tsawm htap ai lam ni hpe shadum ya nga ai.
GA SAN Hkrisatan numsha langai mi, Nat jaw ai la langai hte dinghku shang ai rai yang, Nat mung jaw nang, nawku jawng sa nna akyu mung hpyi rai yang, mara lu na kun?
HTAI Ndai ga-san hte seng nna chyum mungga hta dan tawk jaw da ai mahtai hpe gaw n mu ai. Hkristan amyu shayi langai mi, Nat jaw ai madu wa hpe Nat jaw ai amu hta garum mai n mai gaw atsawm sha sawn yu sadi ra ai lam re.
Hkristan nrum ntau jan gaw, shi a madu wa hpe madat mara, tsawra, daw jau ra ai nga nna (Ehpesu 5:22-24) hta Kasa Pawlu sharin ya ai; raitim, tinang a makam masham hte galai kau n mai ai; makam masham hte nhtan shai ai hkungga nawng jau, nawku ai lamang hta n mai lawm ai nga nna (1 Korinhtu 10:21) hta tsun da ai: “Nanhte gaw Madu Yesu a gawm hpe mung lu, nat a gawm hpe mung lu ai gaw, gara hku mung n mai ai; Madu Yesu a dawsha poi kaw mung sha, nat a dawsha poi kaw mung sha ai gaw, teng sha n mai ai”.
Dai majaw, nat hpe jaw jau ai lamang ni hta n re ai sha, manam tau, daw ai bungli, malu masha lajang jaw ai bungli ni hta kangka let galaw nang ai rai yang gaw, tinang a madu wa hpe tsawra ai, sadi dung nna kasi la mai ai Hkristan amyu shayi langai mi tai na re.
SAN AI NI – Nmawk Jau ginwang, Goi Kahtawng Zaibru yang kaw nga nna, ya, sum tsan de du taw nga ai Fransica Jangma Bawk Ja hte Shawng de, Zau Bung Mare kaw nga lai wa nna, ya, Loije kaw shanu nga ai, Roselin Labya Bawk Htoi