Daini e Madu Karai Kasang gaw, Sape ni hpe madung gun hpai ra na magam lit lahkawng hpe ap ya sai. Karai a mungga hkaw tsun na hte machyi masha ni hpe shamai shatsai ya na lit rai nga ai. Karai mungga hkaw tsun ai gaw wenyi a matu rai nna, shamai shatsai ya ai lam gaw, wenyi a matu Nat tsadan gawt shapraw na matu hte, hkum hkrang hta na ana zinli shamai shatsai ya na matu mung rai nga ai. Shingrai dai lit magam hpe gun hpai sa ai shaloi e, masha ni a ninghkap ai lam hpan lahkawng nga na re.

Dai gaw hkap la ai the n hkap la ai lam re. Nanhte hpe hkap la ai ni gaw, kabu gara hkap hkalum la na re. Dai majaw tinang a matu hpa mung hkum gun sa ngu htet da ai lam rai nga ai. Bai n hkap la ai ni hte hkrum ai rai yang e gaw, lagaw lahpan na kap ai n hpu hpe pi ari jahkrat da mu nga htet dat nga ai. Ngai galaw yang mai byin ai, byin nan byin na, awng dang na ngu hkap la chye ai ni, sadi ra ai lam re. Shiga madat nu wa ni e, anhte a lit gaw, Madu Karai shangun ai hkristan prat hpe sak hkrung nga sa na matu re. Bai makau grup yin kaw na hkap la na, n hkap la na gaw shanhte a myit sha re. Bai awng dang na, hkrat sum na mung Karai Kasang lajang na re. Anhte gaw tinang galaw ra ai lit magam hpe kang ka ai hte, gun hpai sa na sha madung shakut sa ra na ga ai re.