Wa Sarabyin Leo XIV gaw, Catechists ni a Jubilee hpe Laban shani, San Peter’s Square hta Missa hkungga galaw lai wa sai.
Catechists ni a Jubilee Missa hkungga hta, Wa Sarabyin Leo XIV gaw, makam masham hta kaga masha ni hte rau hkawm sa na matu shakut ai ni hpe shakawn shagrau ai hte, Hkristan yawng hpe kam sham ai, myit mada ai, tsawra ai lam hpe sharin la na matu, shadada karum shingtau hkat na matu saw shaga dat ai.
Shi a mungga hta, Wa Sarabyin gaw, dai ni na Kabu Gara Shiga (Lk 16:19-31) hpe myit sumru let, sut su ai wa hte Lazaru a lam hpe tsun dan ai, 2016 ning Chyoi Pra ai Matsan dum lama ai shaning hta, Catechists ni a Jubilee hta hti ai Kabu Gara Shiga langai sha re ai hpe madi madun da ai.
Ndai Kabu Gara Shiga hku nna, Yesu gaw Karai Kasang mungkan hpe gara hku mu mada ai lam hpe anhte hpe madun dan ai, masha langai mi gaw shi a hkala nba ni hpe gwi ni jawm mata hte si taw nga ai zawn rai rai nga ai, kaga masha langai mi gaw chyinghka maga mi de, tsawm htap ai hpun palawng ni hte shi hkum hpe hkyik hkam nga ai zawn re ai hpe madun dan nga ai.
“Dai ni na sut su ai chyinghka kaw majan hte zingri zingrat ai lam ni a majaw hkra machyi hkrum ai amyu bawsang ting a tsin-yam tsindam ni tsap nga ai,” “Tsaban law law na wa ai tim, hpa mung n galai shai ai zawn rai nga ai.” Sut su ai ni gaw shanhte a myi man hta nga ai Lazaru law law si mat ai hpe nmu mada ai zawn, Karai Kasang gaw dai lahkawng yan hpe tara rap ra ai hku galaw ya nna, matsan ai wa a nni nkri hpe mung, sut su ai wa a kabu gara ai lam hpe mung jahkring kau ya na re ngu ai hpe Kabu Gara Shiga hta kam hpa nga ai.
Sut su ai wa si mat ai hpang, Abraham a lahpyen hta Lazaru hpe mu nna, shi hkam sha nga ai lam hpe shi a kanau ni hpe sadi jaw na matu Karai Kasang hpe hpyi nem ai. Raitim, Abraham gaw, hkrung nga ai ni hpe sadi jaw na matu Mawshe hte myihtoi ni nga ai ngu tsun ai, nga nna Yesu tsun ai.
Mawshe hte Myihtoi ni a ga hpe madat mara ai ngu ai gaw, Karai Kasang a hkang da ai ga hte ga sadi ni hpe myit dum ai lachyum rai nga ai, Karai Kasang a lajang ya ai lam gaw kadai hpe mung galoi mung n kabai kau ai,” nga nna Wa Sarabyin tsun ai.
Yesu a hkrung rawt ai lam gaw, anhte hpe hkye hkrang la ai tengman ai, jet ai lam rai nna, Nawku hpung gaw catechists ni hku nna hkaw tsun ra ai tengman ai lam re, nga nna matut tsun ai.
Ndai tengman ai lam hpe tsawra chye na matu sharin la ai hku nna, anhte a myit masin galai shai wa ai hte Karai Kasang hte htingbu wa hpe hpaw ya ai zawn, Kabu Gara Shiga hpe chye na la lu ai, nga nna Wa Sarabyin tsun da nga ai.
Dai hpang Wa Sarabyin Leo gaw, “catechist” ngu ai ga si a lachyum gaw, “nsen kaba hte sharin ya ai, nsen pru hkra galaw ai” ngu ai lachyum nga ai Greek ga si kaw na pru wa ai ngu tsun ai.
Catechist ngu ai gaw, anhte a kanu kawa ni rai tim, Nawku hpung a malai magam gun ai wa rai tim, shanhte a prat hte hkaw tsun ai mungga a masha langai mi re, nga nna tsun ai.
“Anhte yawng gaw anhte a shawng e kam sham ai ni a sakse hkam ai hku nna kam sham na matu sharin hkam la lu saga ai” “Ma kaji ten kaw nna, ram kaji ten, ram kaba ten, asak kaba ten du hkra, ndai prat hkrun lam hta shang lawm let, anhte a makam masham hta, catechists ni gaw anhte hpe manang tai ya nga ma ai.”
Catechist ni hte shanhte a kasi ningli hte kaga masha ni hpe sharin achyin ya ai ni yawng gaw, “shinggyim myit masin hta rawng nga ai tara rap ra lam hte tengman ai lam hpe ra sharawng ai lam” hpe madat mara daw jau ai hku nna, Nawku hpung a sagu rem magam bungli hta lawm nga ai, nga nna Wa Sarabyin tsun ai. Hpang jahtum, Wa Sarabyin Leo XIV gaw, shanhte a makam masham hkrun lam hta kaga masha ni hpe garum shingtau lu na matu, makam masham hte hpring tsup wa na matu, Catechists ni hpe saw shaga da nga ai.
San Augustine, Deacon Deogratias hpe tsun ai hte maren, “Nang hpe madat mara ai wa gaw, madat mara ai hte kamsham lu na, kam sham ai hte myit mada lu na, myit mada let tsawra lu na matu, lam shagu hpe sang lang dan u.”