Daini na Ja Chyum Mungga hpe hti sumru yu ai shaloi e, Mahta hte Maria yan nau a lam hpe na la lu ga ai. Maria gaw kaja dik ai shara hpe lata la nu ai. Dai shara hpe kadai wa e mung kashun la lu na n rai. Ndai ga hku nna, Madu Karai Kasang gaw Matha hpe hpa baw tsun mayu a ta nga yang e, hpa lam hta raitim mung, aten ladaw hte shara ngu ai nga nga ai lam hpe tsun shadum mayu ai rai nga ai. Madu Yesu tsun ai gaw, nanhte a nta kaw ngai nga ai aten hta, ngai a mungga hpe madat na aten dai hpe Maria galaw taw ai ngu ai hpe tsun dan nga ai. Bai maga mi hta amu grai kyin taw nga ai kaw na Karai Kasang nga ai ngu ai hpe dum chye na matu tsun dan mayu nga ai.

Shinggyim ni masha sak hkrung nga ai ten ni hta, mungkan hte seng ai kaw nga pra sa ai Tawra se hkam wa zawn nga pra sa chye ra ga ai. Dai gaw mungkan ntsa sak hkrung nga sa ai ten hta, wenyi lam hte seng ai tara lam ni hpe mung n tawn da ai shakut sa chye ra ga ai re. Daini galaw ai Rosary a hkawhkam jan Chyoi pra Maria kaw na sharin la ra ai langai mi gaw, Nye a wenyi gaw Madu Karai hpe shakawn nga nngai. Dai ga gaw anhte a wenyi lam hta, ahkyak ai lam nan rai nga ai. Mungkan ntsa hta sak hkrung nga ai ten, sumsing sutgan hpe tut e kam hpa nga chye nna, ndai mungkan hta hkum hkrang nga taw ai raitim, myit masin wenyi gaw Karai Kasang hpe, shakawn kungdawn chye na matu sharin ya nga ai.