Karai Kasang gaw shi a Kasha shingtai hpe mungkan ga de shangun dat wu ai rai nna, anhte gaw shi a marang e ahkrung nga mali ga, nga ai rai nna, dai gaw anhte hta e, Karai Kasang a tsawra ai myit dan pru ai lam rai nga ai. Anhte gaw, Karai Kasang hpe tsawra nga ga ai n rai, shi hkum nan anhte hpe tsawra nga ai hte, anhte a shuthpyit mara a matu mara gawng malai hkungga tai u ga, shi a Kasha hpe shangun dat ai lam gaw, tsawra ai lam madung rai nga ai.
1John 4:9-10 ( Yawhan a shagun dat ai laika langai )
N ging dan ai shi a sape ni rai nga ai anhte a matu shi a asak hpe hkungga nawng ya ai Madu Yesu Hkaw Hkam a tsawra ai lam hta grau kaba ai jet ai tsawra lam ngu ai naw nga mai na rai kun? Myit ja ai hta n ga, madat mara lam n nga, rawt malan ai shinggyim masha ni a shut hpyit mara ni a matu si hkam na shi a tsawra dik ai kasha shingtai hpe shangun dat ai du hkra anhte hpe tsawra ai Kawa Karai Kasang a tsawra lam hta grau kaba ai tsawra lam ngu ai naw nga mai na kun?
1John 4:9-10 hta, ( Yawhan a shagun dat ai laika langai )
“Karai Kasang gaw shi a Kasha shingtai hpe mungkan ga de shangun dat wu ai rai nna, anhte gaw shi a marang e ahkrung nga mali ga, nga ai rai nna, dai gaw anhte hta e, Karai Kasang a tsawra ai myit dan pru ai lam rai nga ai. Anhte gaw, Karai Kasang hpe tsawra nga ga ai n rai, shi hkum nan anhte hpe tsawra nga ai hte, anhte a shut hpyit mara a matu mara gawng malai hkungga tai u ga, shi a Kasha hpe shangun dat ai lam gaw, tsawra ai lam madung rai nga ai.”
Anhte yawng gaw Karai Kasang a hkum tsup ai tsawra lam hpe hkam la lu ai ni rai ga ai. Shi tsawra dik ai Kasha a sai a marang e, anhte gaw hpan Madu Karai Kasang hte bai matut mahkai wa lu ai chyeju hpe lu la saga ai rai nga ai. Karai Kasang e tsawra hkrum ai shi a tsawra ai kashu kasha ni anhte rai ga ai majaw, anhte hpe shi galoi mung bai kau da na n rai. Kasha a si hkam ai lam gaw, anhte hpe tsawra ai Karai Kasang a tsawra ai lam galoi mung agrin nga na re, anhte hpe galoi mung shi bai kau da sana nrai, shi Madu hte galoi mung matut gahkyin nga na re, ngu ai lam a sakse rai nga ai.
Anhte a masin salum ra sharawng, kadawn nga ai tsawra ai lam hpe lu la hkra n jaw n ang ai shara ni hta anhte hkan tam chye nga ga ai. Mungkan sutgan arung arai ni hta, arawng aya awng dang lam ni hta hkan tam nga chye ga ai. Jahpawt manap yup rawt wa ai aten shagu anhte ra kadawn nga ai tsawra lam hpe mungkan ga jaw ya lu na myit mada let shakut nga chye ga ai. Kaja wa nga yang anhte a msin salum ra kadawn dik ai tsawra lam gaw Madu Yesu hta anhte lu da sai lam rai nga ai.
Shi Madu a tsawra ai lam hte daini anhte hpe makawp da na matu Karai Kasang ra sharawng nga ai. Shi Madu a tsawra lam kade hkyik hkam kaba nga ai ngu ai lam ni hpe anhte hkam sha chye lu hkra, jahpu manu kaba jaw nna anhte a matu shi lajang da ya sai. Myit htoi Esaia 49:15-16 hta, “Numsha gaw tinang shangai ai kasha hpe matsan n dum ai hte, chyu chyu ai ma hpe malap kau lu na rai ni? gaja wa malap kau timung, ngai nang hpe malap kau lu na n rai. Yu u, nye a lata lahpan hta ngai nang hpe ka da ni ai; na a mare bunghku ni, nye a man e tutnawng rai nga ai.”
Anhte gaw Karai Kasang a tsawra ai kashu kasha ni rai nga ga ai, Hpan Madu Karai Kasang hkumtsup ai tsawra myit hpe lu la ai ni rai ga ai. Karai Kasang a tsawra lam gaw shadawn shadang ngu ai n nga, hkik hkam kaba dik nga ai. Tsawra lam hpe kaga mungkan lam ni hta hkan tam nga ai lam hpe jahkring kau nna, shi Madu a tsawra ai lam hpe hkap la na matu myit galu kaba ai hte shi anhte hpe ala nga ai. Anhte chye na myit mada mai ai tsawra lam hta grau hkik kaba ai tsawra lam jaw ya na matu shi ala nga ai.
Karai Kasang a tsawra ai lam anhte hta shang wa lu u ga lawu na lam ni hpe hkring mi aten la nna sumru akyu hpyi ga:
- Anhte hpe tsawra ai Karai Kasang a tsawra myit kaba hpe sumru yu mai ai. Karai Kasang gaw shi a Kasha shingtai hpe mungkan ga de shangun dat ai lam gaw, Karai Kasang a tsawra ai myit dan pru ai lam rai nga ai. Anhte gaw, Karai Kasang hpe tsawra nga ga ai n rai, shi hkum nan anhte hpe tsawra nga ai;
- Tsawra ai lam hpe lu la na matu Karai Kasang hta n re ai sha, mungkan ga e jaw ya na myit mada let kaning re shara ni hta anhte tam nga ga ai kun?
- N jaw ai shara ni hta hkan tam nna shut kau sai mara ni hpe hkyam sa jaw na matu hpyi nem let, Kawa Karai Kasang a tsawra ai lam hpe hkam la lu hkra aten jaw akyu hpyi mai ai. Anhte hpe shi Madu kade tsawra nga ai ngu ai lam hpe grau chye na wa hkra lam madun ya na matu akyu hpyi mai ai.
