Anhte shingyim masha ni a prat hta, myit ra marin ai lam ni hpe tawn kau lu yang she anhte a myit masin wenyi gaw Karai Kasang kaw lu du na rai nga ai. Shing rai Madu Karai hpe nhprai ai sha myit maju jung kam hpa nawku daw jau ai lam gaw, nanhte Karai Kasang kaw tawn da ai tsawra myit hte masha a ntsa tawn da ai tsawra myit ni grau grau galu kaba wa ai nga nna San pra ai Teresa tsun nga ai. Dai majaw shi tsun ai hta teng man ai hku kyu hpyi ai lam gaw masha ni hpe tsawra myit rawt jat ya lu nna, mai kaja ai lam a apu asi ni nan re.

Ya daini chyum mungga hta Madu Yesu gaw Karai Kasang a tsawra myit hte tara rap ra lam hpe manu n shadan nna, n`ra ai nawku hpung a hkan sa la ni hpe chyu madung tawn da chye ai Hparishe ni hpe tsun madi madun da nga ai. Shanhte ni gaw nawku hpung tara ni hte ritkawp tara ni hpe tup hkrak hkan sa ai ni raitim, Karai Kasang a tsawra myit hte masha ni a lapran e, shada da tara rap ra ai lam hkan galaw na malap mali rai nga ma ai. Dai majaw anhte mung Hparishe ni zawn n byin hkra shading sharai nga sa ga law.