Kaja ai machye machyang lam gaw, masha ni hpe ningsin kaw na woi shalawt ya ai re. Dai hta n-ga, dai machye machyang hpaji hte maren tinang hkum nan sak hkrung nga sa nna, kaga masha ni hpe mung sharin ya na nga yang, tinang hkum hpe shalawt la lu ai hta n ga, masha shagu a matu ninghtoi kaba langai byin wa na sha re. N kau mi gaw Hparishe ni hte chyum laika sara ni gaw Yuda masha ni a hkan sa ra ai ritkawp tara lam ni hpe pu pu le le sawk sagawng chye da ma ai.

Dai shanhte chye ai mai kaja ai hpaji lam ni gaw, kaga wa hpe sharin ya na matu lak san sha rai taw nga ai. Shanhte hkum nan a matu hkan sa shakut na matu gaw n ra sharawng nga ma ai. Dai majaw Madu Yesu shanhte hpe tsun ai gaw, nanhte gaw sumsing mungdan a Zaw hpe madu da nga tim, madu hkum nan n shang myit dai. Bai shang na matu shakut nga ai ni hpe mung, hkum pat da mit dai ngu mu ai. Shiga madat nu wa hpu nau ni e, Hkaristan ni a hkrun lam madung gaw, Madu Yesu zawn tinang a prat hpe masha law law a matu ap nawng daw jau hkawm sa ra ai prat nan re. Dai prat gaw n gup aga hte sha n rai, ta tut magam bungli laikyang ni hte rau tsawra myit madun let garum shingtau pawn ba chye ai lam nan re.