Shaning shagu November shata hta nlung nnan sha poi, chyeju dum poi galaw ga ai. Nlung nnan a matu chyeju dum ai ngu ai hta jan nna jawm myit yu ga. Chyeju dum ai ngu ai hpe anhte nga mu nga mai, law law htam htam hkam la lu ai, ngwi pyaw ai aten hta chyeju dum ai gaw htuk manu nga ai. Dai hta grau nna yak hkak jam jau ru yak kyin dut lam ni law la nga ai aten hta chyeju dum ai lam ni hpe grau n’gun dat galaw ra ga ai.
American Mungdan hta galaw ai chyeju dum nhtoi a lam kadun mi tsun dan mayu ai. American Mungdan a gumsan magam langai rai nga ai Abramham Licoln gaw Thankgiving Day, chyeju dum n’htoi hpe masat da ya sai. Dai aten hta American Mungdan kata dinghku majan byin nna, du daw sai hkaw law la ai aten, mungdan ting sak hkrung ngang grin nga lu hkra shakut shaja nga ra ai aten hta Karai Kasang hpe chyeju dum ai n’htoi ngu nna masat da ya sai.
Anhte a sak hkrung lam mahkra gaw Karai Wa kaw nna re, shi hte sha seng ai ngu ai lachyum rai nga ai. Anhte mung ya aten hta ru yak jam jau matsan ai, myit kaji, myit daw hpa lam kaba hte hkrum ra ai mungdan dinghku majan byin nna masha shada da, sat hkat ai, bawm jahkrat bun ai, dum nta ni daw hten, hkru mat ai hte kaga n chye tsun dan ai, machyi hkrum ai lam law law anhte hpe dip shingdang da nga ai.
Dai zawn re ai aten hta anhte hpa majaw chyeju dum ra ai ta? Hpa majaw chyeju dum poi hpe galaw ra ga ta? Anhte dum nga ra ai tengman ai lam ni gaw ( 1 ) chyeju dum chye ai myit hpe anhte sharin la ra ga ai. N rai yang anhte a myit masin ni hka hkup ai hte hpring nga na ra ai. ( 2 ) Chyeju dum ai myit hpe anhte sharin la ra ga ai. Dai n rai yang anhte myit daw myit hten ai hpe sha hkam sha ra nga na rai ga ai.
( 3 ) Chyeju dum ai myit anhte hta n rawng nga yang tinang akyu hpe sha machyu ai hte zai mazut ai lam sha myit kraw lawang hta kaba jat wa na ra ai.
Anhte yak hkak jam jau dik ai aten hta pyi Karai Kasang hpe chyeju dum ra ga ai. Anhte hta byin mabyin yawng gaw shi Karai Wa hte seng nga ai, shi a majaw hte anhte byin wa, tai wa saga ai.
Ya daini anhte a Myanmar Mungdan masa mung nga rai zawn grung nga ai raitim daini gaw Hkristu hkawhkam a poi n’htoi mung rai nga ai. Shi Madu gaw simsa lam a hkawhkam wa rai nga ai. Anhte si tim hkrung tim, pyaw ai, kabu ai, yak ai, yawn ai lam mahkra hpe shi madu a lata hta ap tawn da nna galoi mung kabu gara mahkawn mangwi let chyeju dum nga na sut la nga ai law.
