Daini na Ja Chyum Mungga hpe hti sumru yu ai shaloi e, Karai Kasang hpe Yesu shakawn ai lam hte Sape ni a ahkaw ahkang lam ni hpe na la lu ga ai. San pra ai Thomas a Kempis tsun ai, nang gaw atai masum hta hkum langai sha re ai Karai Kasang a lam hpe hkaja na nyan marai nga tim mung, shagrit shanem ai myit n nga yang, ndai atai masum Karai langai sha re ai lam hpe gara hku mung chye madat ra sharawng lam n nga ai. Madu Yesu gaw laika hpaji n chye ai ni, garen gari re ai ni hpe sumsing mungdan hte seng ai lam ni hpe tsun dan ya ai majaw, kasha Karai Kasang gaw kawa Karai Kasang hpe shakawn tsun da nga ai.

Ndai shara hta hpaji chye ai ni hte hpaji lam hpe ninghkap tsun ai n re. Myit tsaw gumrawng ai lam hpe ninghkap ai she rai nga ai. Shinggyim masha gaw tinang chye chyoi kung kyang ai lam ni hta sha gumrawng myit ni nga chye wa ai re. Masha gaw kade mi ram ai. Dai ram ai kung kyang ai lam gaw, shadawn sharam ai lam nga nga ai. Madu chye ai, galaw sa dandi lu ai lam ni hta tawt jan lai ai lam ni hpe Karai Kasang a lata hta ap da let, tinang kaw nga ai lam ni hte chye chyang ai hpaji ni hpe e, tinang a matu sha n rai, kaga masha ni a matu hta mung akyu jashawn let, sak hkrung nga sa ai lam gaw, shagrit shanem ai lam nan re. Ndai shagrit shanem ai lam gaw, Wenyi a apu asi ni rai nna, Madu Karai hpe yu kasi la ai sak hkrung sa ai lam hta mai kaja dik ai lam nan re.