Daini na Ja Chyum Mungga hpe hti sumru yu ai shaloi e, Myi kyaw ai marai lahkawng hpe Yesu myi mu shangun ai lam na lu ga ai. Myi n mu ai. Myi kyaw ai gaw wunli n hpring zup ai ngu ga shaka dingsa prat hta hkap la da ma ai. Shingrai dai ten nawku tawn makau de n mai sa ai ngu hkum da ai ni a jahpan hta e, myi nmu ai ni a mying No. langai rai nga ai. Myi n mu ai ngu ai hta, hkum hkrang a myi n`mu ai hte wenyi a lam yan hta, myi n mu ai ngu chyum laika hta tsun da nga ai. Daini na kabu gara shiga hta, myi n mu ai masha lahkawng gaw, hkum hkrang a myi n mu ai raitim, wenyi myi n gun gaw mu mada lu taw nga ai a tsam hpe mu mada lu ga ai.

Shan lahkawng gaw Madu Yesu hpe n mu lu ai raitim, makam masham nga ma ai. Shan kaw e, kam sham ai myi mung nga nga ma ai. Wenyi a myi hte yu mada ai majaw, Madu Yesu hpe mu mada nna, “David a kasha Yesu e anhte hpe matsan dum la rit law” ngu marawn ja htau let, garum hpyi nga ma ai re. Shaloi e Madu Yesu gaw, nanhte hpe ngai shamai ya lu ai hpe Kam sham mit ni, ngu shan lahkawng hpe san ai shaloi, myi n mu ai yan lahkawng gaw, anhte kam sham ga ai ngu bai htan ma ai. Shaloi jang shan lahkawng myi bai mu wa lu ma ai. Shing rai Chyum laika sara ni n kau mi myit mu ma ai. Raitim Wenyi myi (Sh) Makam masham myi n mu ma ai. Makam masham mi kyaw hten nga ma ai. Ndai myi nmu ai yan lahkawng gaw, wenyi myi (sh) makam masham myi hte Madu Yesu hpe mu lu ma ai. Kam ai majaw, shamai shatsai ya ai hpe hkam la lu ma ai re.