Nmut shang na shara law law nga ai, amu galaw na ni mahtang n law nga ma ai (Mahte 9:37).” Ndai Yesu a ga gaw dai ni anhte a na hta moi na hta grau nna nsen kaba hte ngoi nga ai, Kaja wa nga yang anhte a grup yin hpe yu dat ai shaloi Yesu hpe n chye shi ai ni grai law nga ai hpe yawn hpa tengman ai lam hpe mu lu nga ga ai re.
Karai Kasang a matu anhte galaw ai magam bungli gaw, Hkristu a Hkum hkrang a Extra-Ordinary Ministers hku nna, Tara hkaw sara/num, Lector/commentator,alcolyze hku nna hte kaga nawku hpung magam bungli ni hta shang lawm ai ni hku nna nawku hpung kata magam gun ai hta lai nga ai. Anhte nawku hpung hta shang lawm ai lam hta aten grau bang ra ai, kawsi hpang gara nga ai ni, hkum hkrang/myit masin machyi makaw hkrum nga ai ni hpang de pru hkawm sa ra ai. Anhte a shinggyim wuhpawng kata na matsan mayan ni hpang de Yesu hpe shapraw dan ra ai, hpa majaw nga yang shanhte mung Yesu hpe ra nga ai, shanhte hpe lam madun ya na matu Yesu hpe ra nga ai.
Anhte kasin kamun baptisma hkam la ai a marang e, yu maya nawku hpung masha ni rai tim Yesu a lam sakse hkam, hkaw tsun na matu shaga la hkrum ga ai. Galu kaba wa ai makam masham gaw garan gachyan ai makam masham rai nga ai. Adventu aten kaw nna, matsan mayan ni hpe garum shingtau let, Yesu a shangun ma, sape ni hku nna jai lang na ahkang jaw ga.
Raitim, tinang a nga sat nga sa hte arawn alai ni hku nna mung Yesu hpe sakse hkam mai nga ai. Masha nkau ni gaw Yesu a uphkang ai lam hpe n re ai sha, shanhte a uphkang ai lam hpe shadik shatup ma ai. Tinang a uphkang ai lam hpe madung tawn nna Hkristu a hpang hkan nang ma ai. Shing rai, shagrit shanem ai the sak se hkam na malai gumrawng gumtawng ai hpe lata la ma ai. Masha ni hpe tinang hpang maga de kayin la na hte dang la na malai shanhte mahtang tinang a makam masham kaw na tsan mat wa ai ni tai wa ma ai.
Kaja ai sape gaw, lung rawk zawn ngang kang ai makam masham nga ai, tinang hkum hpe sha tam ai, gumrawng gumtawng ai n re. Dai gaw grau nna shagrit shanem ai hte Karai Kasang a grau kaba ai hpung shingkang a matu shi a sasana magam hpe atsin sha galaw na matu myit dik nga ai.