Daini na Ja Chyum Mungga hpe hti sumru yu ai shaloi e, Yesu shangai wa na lam tau tsun dan ai hpe na lu ga ai. Ngai gaw madu a mayam jan rai nga nngai. Na a ga hte maren ngai hta byin wa u ga. Hkristan prat hpe shadan shadawng ya ai ga yan nan re. Ndai ga yan gaw kadun tim lachyum namnak nga ai. Ndai ga si gaw, hkristan prat a matu dawhpum dawnu kaba nan re. Madu Yesu gaw shi nni nhkri n hkam shi yang, nang wa a myit ra ai hte maren byin wa u ga ngu tsun lai wa sai. Maria mung lamu kasa a shawng e, Madu a myit ra ai hte maren byin wa u ga ngu tsun ai. Ndai ga gaw jahpawt kaw nna, shana du hkra ahkyak la ai ga si re.

Adam hte Eva hpe mara n kap hkra hpan da ai raitim, Karai a ra sharawng ai lam n hkan galaw ai majaw, mara galaw kau ma ai. Nu Maria hpe mara n kap ai hku shangai wa ai rai nna, Karai ra sharawng ai hku nga sa nna, mara n galaw ai. Shinggyim masha ni a hkye hkrang la ai lam hpe gun sa ya ai. Maria gaw Karai Kasang a ra sharawng ai hte maren sak hkrung nga sa ai. Dai majaw, Karai Kasang kaw na kumhpa rai nga ai chyeju shi kaw nga ai. Ndai chyeju kade ram ahkyak ai ngu ai gaw, Chyum mungga daw lahkawng hta tsun da nga ai. Maria a prat ningnan kaw nna, jahtum du hkra chyeju hte hpring zup nga ai. Shi a prat hta mara ngu ai n nga ai. Nu Maria zawn madat mara ai hte a sak hkrung nga yang, anhte a prat mung chyeju hta hpring zup nga na re.