Myitkyina Zone ngu ai, Myitkyina, Manmaw, Lashio Saradaw ginwang ni hta Sasana magam gun nga ai San Francis Xavier Mama ni a Xavier poi nhtoi hte Mama kaba ni marai ( 7 ) a chyeju shakawn jubali Missa Hkugga hpe ( 3. 12. 2025 ) St. Francis Xavier poi ninghtoi shani, Myitkyina Saradaw Sasana, Njang Dung, St. Paul Nawku jawng hta galaw la lu sai rai nga ai.
Missa Hkungga hta Wa Saradaw John Mung Ngawn La Sam, Yangon kaw nna du lung wa ai Yangon ningtau Saradaw Francis Than Tun yan hte wa jau ni, Myitkyina Saradaw Sasana hta magam gun nga ai uhpung shagu na Mama ni, Brother ni hte nawku hpung masha ni law law sa du nna chyeju shakawn lawm lai wa ai.
Jubilee hkam la ai Mama ni hta na ( 50 ) ning hpring Ja Jubali hkam la ai Mama kaba ni gaw Mama Paulin Audrey Bernard, Mama Olivia Lazing Kaw Lum, Mama kaba Jutta Clare Jaiwa Ji Roi ni marai ( 3 ) rai nna 25 ning hpring gumhpraw jubilee hkam la ai mama ni gaw Mama Martha Hpaujung Doi Awng, Mama Rose Mary Esther Yaw Saung, Mama Mary John Male Lu Mai, Mama Rose Angeline Maran Nang Doi ni marai ( 4 ) rai nga ai.
Wa Saradaw John Mung Ngawn La Sam kaw nna Karai Kasang a magam gun ai gaw tinang byin ai majaw n re, Karai Kasang gaw tinang hpe lata la nna jai lang ai majaw re, Karai Kasang shaman chyeju n lawm yang, hpa mung n lu galaw ai, dai hte maren Karai Kasang a shaman chyeju lawm mung n mai byin ai lam hpa mung n nga ai lam Mama ni hpe n’gun jaw ga tsun ai.
St. Francis Xavier Mama uhpung ni Myanmar Mungdan de du shang wa ai shaning ( 128 ) ning na sai rai nna, ya aten Mama ni marai ( 440 ) jan nga sai hte Myitkyina Zone hta Sasana magam gun nga ai Mama ni marai ( 130 ) jan rai nga ai.
St. Francis Xavier Mama uhpung ni gaw Myanmar, Philippines, America, Italy, Thai Mungdan ni hta Sasana magam gun taw ai lam chye lu ai.
Shiga – Julia Ja Ing
