Daini na  Ja Chyum Mungga hpe hti sum ru yu ai shaloi e, sumnung shingdi ai Hkristu a lam na la lu ga ai. Ngai a kandang gaw hpai loi ai. Madu Yesu gaw anhte gara hku sak hkrung nga sa ra na ngu ai hpe mu mada lu ai hkrang hte sharin shaga ya ai re. Kandang ngu ai ga si gaw, hpaji byeng ya chyum laika hpe madi tsun da ai lam re. Hpaji byeng ya rai nga ai Madu Karai Kasang gaw shi kaw sa wa nna, shi a lam sharin la na matu saw shaga nga ai. Shi zawn si mani ai, shgrit shanem tsawra myit hte sak hkrung chye na matu shi kaw sa sharin la ra na re lam Madu Yesu shi tsun ai.

Nye a kandang hpe hpai u ngu ai lachyum gaw, anhte ni a prat hpe shi Madu kaw ap nawng nna, shi lam woi madun ai hku sak hkrung na matu re. Anhte a lagaw lahkam shagu hpe shi makawp maga ya na rai nga ai. Hpaji byengya a madu rai nga ai Madu Karai Kasang gaw, lam kaja hpe tut e madun ya nga na rai nga ai. Hka pung lahkawng hpe lata hte hpai ai hta, kahpa ntsa kaw hpai ai gaw grau loi hkyam sa nga ai. Anhte hpai ai kandang n bung yang, du machyi ai, grau li ai zawn hkam sha ai. Dai zawn sha anhte a prat hta e mung, hpai ra ai lit magam ni law law hpai nga ga ai. Dai shaloi e Madu Yesu zawn asak hkrung nna, shi lam madun ya ai hku sha sak hkrung hkawm sa ai rai yang, anhte a lit magam ni hpai loi ai. Dai majaw shi Madu zawn tsawra myit hte sak hkrung na matu Madu anhte hpe saw shaga nga ai.