Daini na Ja Chyum Mungga hpe hti sumru yu ai shaloi e, Yesu shangai wa na lam tau tsun dan ai hpe na lu ga ai. Nye madu a kanu ngai kaw sa na chyeju gaw ngai gara hku hkam la gring na i? nga nna Elizabeth tsun ai ga hpe myit yu yang, Elizabeth a shagrit shanem ai lam mu lu ga ai. Nu Maria gaw shi hta grau na galu kaba ai shayi num ngu hkam la ai. Maria hkum nan mung grai shagrit shanem ai jan re. Karai Kasang a myit ra ai hpe hkap la hkan sa ai jan re. Nu Maria gaw san seng san pra ai, tsawra ai myit ni hte hpring zup ai jan re. Chyeju mahkra hte hpring zup ai jan nan mung re.

Dai majaw shi hte hkrum zup ai ni shagu kaw e, Karai Kasang a tsawra myit, shi kaw nga nga ai Karai Kasang hpe woi sa ya ai wa mung re. Nu Maria gaw Elizabeth kaw Karai a kasha hpe woi sa wa ya ai. Shingrai Karai Kasang a mying ning sang hta arau kabu gara nga ma ai. San Elizabeth mung Maria hte kanau kana daw ai raitim, Karai a Kanu, anhte a madu jan ngu tsun shaga nga ai. Maria mung kana Elizabeth kaw sa du ai lam kaga langai mi gaw, Elizabeth hpe sa garum na matu rai nga ai. Anhte ni ra kadawn shagu Nu Maria gaw, garum ya na matu du sa ya ai re. Shi gaw anhte a kanu re. Anhte yak hkak jam jau mang hkang ni hkrum wa yang shi tut e makawp maga ya ai. Shi a kasha Madu Yesu mung anhte hte a rau nga nga ai. Ra nga ai chyeju ni hpe jaw ya nga ai hpe teng sha tsun nga ai law.