Marai langai ngai anhte hpe kau da ai hpang, shi a ahkyak ai lam hpe anhte chye na ai lam law law nga ai kun? Shing nrai, manghkang byin nga ai masa hta du nga sai hpe hpang de chye na ai aten du hkra, myit malai lu na matu anhte a kraw kata na nsen hpe n madat ai kun?

Yesu, myit malai lu na matu shaga ai lam gaw ndai aten du hkra matut manoi rai nga ai, anhte a makau grup yin na masha ni hku nna mung, anhte a myit masin kraw lawing kaw nna mung anhte hpe tsun shaga nga ai. Dai hpe n yu, n-na, n hkan galaw ai, grau nna madat mara ra ai lam n nga ai, hpa majaw nga yang madat mara nna myit malai lu na matu gaw anhte hkan sa ra ai teng man ai lam rai nga ai.

Yesu a matu lam lajang ya ai Yawhan zawn, anhte mung daini na prat na Yawhan tai ra ga ai. Shingrai anhte a grup yin na ni hpe mung myit malai lu na matu sumnung shingdi ai hku shaga ra ai. Ndai lam gaw anhte Kahtawlik hpung masha ni a matu lit magam (call of duty) rai nga ai.

Anhte a Kashin Kamun Sakramentu a majaw anhte gaw dai ni na Yawhan rai nga ai hpe n malap kau ga. Dai majaw, myit malai lu na matu mung, galai sha wa lu na matu mung saw shaga ra ai. Ndai shaga la ai lam awng dang na matu anhte gaw ndai hpe sumnung shingdi ai, shagrit shanem ai hte matsan dum myit hte galaw ra ga ai.

Yesu gaw myihtoi Elia lahkawng lang bai du sa ai gaw Yawhan Baptista rai nga ai gaw dan dawng nga ai. Raitim dai aten na masha law malawng gaw ndai mungkan a lam ni hta bungli kyin nga ai majaw, shanhte a prat hpe bai gram lajang na matu Yawhan a ga hpe n chye na la ma ai. Karai Kasang a kasa a ga hpe madat na aten n lu tim shanhte a akyu ara a matu aten gaw lu nga ma ai.

Yawhan zawn hkawm sa yang, anhte hta sum mat na hpa mung n nga ai. Rai sa, dai gaw nampan sun kata hkawm sa ai zawn n rai na re, chyam dinglik lam ni mung nga na re. Rai ti mung, Hkristu gaw anhte hte rau rai nga a yang gaw, anhte hpe kadai wa ninghkap lu na rai ta? Yesu a matu, kadai mung anhte a hpang kaw atsin sha madi shadaw ya nga na n-re.