Daini na myit sumru akyu hpyi lamang a ga-baw hpe No Better Friend
(Grau Kaja ai Manang N nga Sai) ngu nna masat ga ai. Dai hte seng ai chyum mungga hpe Shingran Laika daw kaba masum, kaji hkun (3:20) kaw na la ga:
“Yu u, ngai gaw chyinghka akawk let tsap nga nngai: nye a nsen na nna chyinghka hpaw ya ai wa kadai kaw rai timung, ngai shang nna shi hte rau lu rau sha lu na nngai, shi mung ngai hte rau lu rau sha lu na ra ai.”
Madu Karai Kasang gaw anhte hte rau lu sha mayu ai nga nna ga shagawp lang nga ai. Shi hpan da sai nga yawng nga pra a janmau rai nga ai masha hte ni htep hkuhkau nga mayu ai hpe madi madun ya ai.
Na a manang marai langai ngai nang hpe shinggan shat seng de sa nna shat sha ga ngu nna saw ai zawn; Karai Kasang mung nang hte manang tai mayu nga ai- nang kaw na aten hpyi nga ai. Shani shagu shi na a salum chyinghka hpe sa akawk nga ai.
Nang shi hpe chyinghka hpaw ya nna, madat ya ai rai yang, kaga manang ni hte hkrum shaga chyai ai hta grau nna myit dik myit payaw ai hpe hkam la lu na ndai.
Na a prat hta gara daw hta Madu Karai a manang tai ya ai hpe grau ra nga ai kun? Kasa Yawhan daw kaba shi-manga, kaji shi-manga (15:15) hta gaw Yesu ning nga tsun da ai:
“Ya kaw nna ngai nanhte hpe mayam n ngu na ni ai; kaning rai nme law, mayam gaw madu galaw ai amu hpe n chye wu ai: nanhte hpe ngai jinnghku she ngu na made ai; nye Wa kaw na ngai na la ai the yawng, ngai nanhte hpe chye shangun masade ai”.
Dai ga hpe yu ai shaloi, Karai Kasang gaw, shi shamat kau sai – shi hte shinggyim masha a lapran na hkuhkau lam hpe – Kasha Yesu si hkam ai a marang e bai lu la sai hpe chye lu ga ai. Shawng nnan na shinggyim masha shut hpyit nna hkuhkau lam hpe shamat kau ai aten kaw nna Karai Kasang gaw dai manang ngu ai hkuhkau lam hpe bai lu la na matu n sin nsa shakut wa sai.
Shinggyim masha manaw manang ni kaw na nang lu la ai hta, Karai Kasang kaw na grau lu la mai nga ai. Shaga chyai na manang ra ai nga yang, “Chyinghka e tsap let akawk nga nngai” nga nna Madu tsun nga ai.
Na manang ni hpaji jaw ai hpe nang rai ai rai yang, Chyum Laika a Sara rai nga ai Chyoi Pra ai Wenyi gaw Karai Kasang a hpaji byen-ya hpe madun dan sharin ya na matu ala nga ai.
Yawhan, daw kaba shi-kru, kaji shi-masum (16:13) hta Yesu tsun ai: “Dai tengman ai Wenyi du sa jang, shi gaw tengman ai lam yawng mayawng nanhte hpe madun na ra ai: dai wa gaw shi a myit hte tsun na ra ai n rai; na la lu ai hte made tsun dan na ra ai: htawm hpang de byin na ra ai lam mung, shi nanhte hpe tsun dan na ra ai.”
Nang kabu mani mayu yang mung, Karai Kasang gaw madawn n dang ai kabu gara ai nang hpe jaw mayu nga ai:
Shakawn Kungdawn, daw kaba latsa e hkun-kru, kaji langai kaw nna masum (126:1-3) hta:
“Karai Kasang gaw Zion a bawng dung ai ni hpe nhtang dat mu ai shaloi e, anhte wa yup mang mu ai ni zawn, rai nga ga ai.
Dai shaloi anhte a n-gup mani ai hte,
anhte a shinglet shakawn ai hte hpring nga ai:
‘Yahwe shanhte a matu bungli kaba galaw nu ai’ nga nna amyu masha ni tsun nga ma ai.
Rai sa, Yahwe anhte a matu bungli kaba galaw nu ai;
dai rai nna anhte kabu gara nga ga ai.” nga nna lawm nga ai.
Kaja dik ai Manang anhte lu ga ai; shi gaw tsan ai shara kaw n rai.
Shakawn Kungdawn, daw kaba sanit-shi-masum, kaji hkun-masum kaw nna hkun-kru (73:23-26) hta:
“Rai timung, ngai gaw tut tut nang hte rau rai nga nna, Nye a hkra lata hpe nang jum ya nga ndai.
Na hpaji daw ai hte nang ngai hpe woi la nna, Hpang jahtum e, hpung shingkang hte ngai hpe hkap la na rai nga ndai.
Sumsing lamu hta e, ngai kadai hpe lu nga nta?
Nang hpe lu yang ngai mungkan ga hpe hpa n ra nngai.
Nye a hkum shan hte myit masin mat wa timung, Karai Kasang gaw
Nye a myit lunghkrung hte prat dingsa na Sali wunli rai nga ai” nga nna ka da nga ai. Dai laika sara wa a hkam sha ai lam gaw anhte a hkam sha ai lam mung rai nga ai.
Akyu Hpyi Ga
- Karai Kasang nang the manang tai mayu nga ai, ngu ai hpe sumru yu u.
Yesu tsun ai ga hpe bai myit dum ga: “Ya kaw nna ngai nanhte hpe mayam n ngu na ni ai; kaning rai nme law, mayam gaw madu galaw ai amu hpe n chye wu ai: nanhte hpe ngai jinnghku she ngu na made ai; nye Wa kaw na ngai na la ai the yawng, ngai nanhte hpe chye shangun masade ai”.
- Na myit masin salum chyinghka hpe hpaw let Karai Kasang a shanu nga ai hpe tau la u. “Yu u, ngai gaw chyinghka akawk let tsap nga nngai: nye a nsen na nna chyinghka hpaw ya ai wa kadai kaw rai timung, ngai shang nna shi hte rau lu rau sha lu na nngai, shi mung ngai hte rau lu rau sha lu na ra ai” ngu ai Yesu a ga hpe bai dum ga.
- Karai Kasang the manang tai lu ai hta kabu pyaw myit dik u. Nang shi the shaga jahta mayu ai lam mahkra, shi hpe tsun dan u. Shi a kabu gara ai hpe mung hkam la u.
Shakawn kungdawn (73) hpe bai myit dum u:
“Rai timung, ngai gaw tut tut nang hte rau rai nga nna,
Nye a hkra lata hpe nang jum ya nga ndai.
Na hpaji daw ai hte nang ngai hpe woi la nna, Hpang jahtum e, hpung shingkang hte ngai hpe hkap la na rai nga ndai.
Sumsing lamu hta e, ngai kadai hpe lu nga nta?
Nang hpe lu yang ngai mungkan ga hpe hpa n ra nngai.
Nye a hkum shan hte myit masin mat wa timung,
Karai Kasang gaw Nye a myit lunghkrung the
prat dingsa na Sali wunli rai nga ai.”
Yawng, kaja dik ai Manang rai nga ai Madu Karai hpang de lani the lani ni htep sit shang wa lu myit ga law.
